పవన్ కల్యాణ్ గురించి సమంత ఆసక్తికర వ్యాఖ్యలు.. పాత వీడియో వైరల్

పవర్ స్టార్ పవన్ కల్యాణ్ అంటే వెండితెరపై ఒక పవర్-ప్యాక్డ్ పెర్ఫార్మర్. కానీ కెమెరా ముందు ఎంత ఎనర్జీ చూపిస్తారో, బయట అంత సింపుల్‌గా, మొహమాటంగా ఉంటారని ఆయనతో పనిచేసిన వారు చెబుతుంటారు. సరిగ్గా ఇదే విషయాన్ని నటి సమంత గతంలో ఓ ఇంటర్వ్యూలో పంచుకోగా, ఆ వ్యాఖ్యలు ఇప్పుడు సోషల్ మీడియాలో మరోసారి చక్కర్లు కొడుతున్నాయి.

'అత్తారింటికి దారేది' సినిమా షూటింగ్ సమయంలో జరిగిన ఓ ఆసక్తికరమైన సంఘటనను సమంత గుర్తుచేసుకున్నారు. స్విట్జర్లాండ్‌లో ఒక పాట చిత్రీకరణ జరుగుతున్నప్పుడు, అక్కడున్న జనాలను చూసి పవన్ కల్యాణ్ డ్యాన్స్ చేయడానికి చాలా ఇబ్బంది పడ్డారని ఆమె తెలిపారు. "అంతమంది జనం చూస్తుంటే నేను చేయలేను" అంటూ ఆయన నేరుగా కారవాన్‌లోకి వెళ్లిపోయారని సమంత వివరించారు.

ఆ సమయంలో దర్శకుడు త్రివిక్రమ్ శ్రీనివాస్ జోక్యం చేసుకుని, "మీరు చేయగలరు.. రండి.." అంటూ పవన్‌ను ఒప్పించే ప్రయత్నం చేశారని చెప్పారు. అప్పుడు పవన్, "నేను చేయగలనంటారా?" అని త్రివిక్రమ్‌ను అడగటం చూసి తాను నివ్వెరపోయానని సమంత అన్నారు. "అంత పెద్ద స్టార్ అయ్యుండి కూడా అంత సింపుల్‌గా, మొహమాటంగా ఎలా ఉంటారా అని నాకు చాలా ఆశ్చర్యం వేసింది. ఆయన బయటకు అలా కనిపిస్తారు కానీ, పది మందిలో ఏదైనా చేయాల్సి వస్తే చాలా సిగ్గుపడతారు" అంటూ పవన్ వ్యక్తిత్వం గురించి సమంత చేసిన ఈ వ్యాఖ్యలు ఆయన అభిమానులను విశేషంగా ఆకట్టుకుంటున్నాయి.