అసలు తగ్గేదేలే.. 70లోనూ అదే గ్రేస్, అదే స్టైల్!

వయసు కేవలం ఒక అంకె మాత్రమేనని మెగాస్టార్ చిరంజీవి మరోసారి నిరూపించారు. 70 ఏళ్ల వయసులోనూ ఆయన తన స్టైల్, ఎనర్జీతో అభిమానులను ఫిదా చేస్తున్నారు. ఇటీవల రవి స్టూడియోస్ నిర్వహించిన ఒక ప్రత్యేక ఫొటోషూట్‌లో చిరంజీవి పాల్గొన్నారు. తన నివాసంలో జరిగిన ఈ షూట్‌లో ఆయన ఐదారు రకాల కాస్ట్యూమ్స్‌ మార్చి ఫొటోలకు ఫోజులిచ్చారు. ఈ ఫొటోలు ప్రస్తుతం సోషల్ మీడియాలో వైరల్ అవుతున్నాయి.

ఈ ఫొటోలలో చిరంజీవి లుక్స్ చూసిన నెటిజన్లు ఆశ్చర్యం వ్యక్తం చేస్తున్నారు. "70 ఏళ్లలో కూడా 40 ఏళ్ల కుర్రాడిలా అదరగొడుతున్నారు" అంటూ ప్రశంసలతో కామెంట్లు పెడుతున్నారు. ఆయన ఫిట్‌నెస్, గ్రేస్ చూసి ముగ్ధులవుతున్నారు. ఇటీవల ‘మన శంకరవరప్రసాద్ గారు’ సినిమాలోని ఓ పాటలో చిరంజీవి స్టైలింగ్‌పై కొన్ని విమర్శలు వచ్చిన సంగతి తెలిసిందే. అయితే, ఈ కొత్త ఫొటోషూట్‌తో ఆ విమర్శలన్నింటికీ ఆయన స్టైలిష్‌గా సమాధానం ఇచ్చారని అభిమానులు భావిస్తున్నారు.

సినిమాల విషయానికొస్తే, 'భోళా శంకర్' తర్వాత కొంత విరామం తీసుకున్న చిరంజీవి, 2025లో మాత్రం వరుస ప్రాజెక్టులతో బిజీగా ఉండనున్నారు. ఆయన నటిస్తున్న ‘మన శంకరవరప్రసాద్ గారు’ జనవరిలో విడుదల కానుండగా, భారీ అంచనాలతో రూపొందుతున్న ‘విశ్వంభర’ వేసవిలో ప్రేక్షకుల ముందుకు రానుంది.

వీటితో పాటు దర్శకుడు బాబీతో ఒక పవర్‌ఫుల్ యాక్షన్ సినిమా, శ్రీకాంత్ ఓదెల దర్శకత్వంలో మరో వయలెంట్ డ్రామా చేయనున్నారు. శ్రీకాంత్ ఓదెల సినిమాలో చిరంజీవి సరికొత్త మేకోవర్‌లో కనిపించనున్నారని సమాచారం. ఇవి కాకుండా మరో రెండు, మూడు ప్రాజెక్టులు కూడా చర్చల దశలో ఉన్నట్లు తెలుస్తోంది. ఈ వయసులోనూ ఆయన చూపిస్తున్న డెడికేషన్ ఎందరికో స్ఫూర్తిగా నిలుస్తోంది.