"చాలా కాలం తర్వాత"... అంటూ ఇంటర్నెట్‌ను ఊపేసిన కోహ్లీ

టీమిండియా స్టార్ బ్యాటర్ విరాట్ కోహ్లీ మైదానంలోనే కాదు, సోషల్ మీడియాలో కూడా తానే కింగ్ అని మరోసారి నిరూపించాడు. తన అర్ధాంగి, నటి అనుష్క శర్మతో కలిసి ఉన్న ఒక అందమైన ఫొటోను ఇన్‌స్టాగ్రామ్‌లో పంచుకోగా, అది పెట్టిన కొద్ది గంటల్లోనే ఇంటర్నెట్‌ను షేక్ చేసింది. ఈ పోస్ట్‌కు కేవలం 15 గంటల వ్యవధిలోనే 9 మిలియన్లకు పైగా (90 లక్షలు) లైకులు రావడం ఆయనకున్న సూపర్ డూపర్ ఫ్యాన్ ఫాలోయింగ్ కు నిదర్శనంగా నిలిచింది.

ప్రస్తుతం కుటుంబంతో కలిసి లండన్‌లో సమయం గడుపుతున్న విరాట్ కోహ్లీ, ఈ ఫొటోకు "చాలా కాలం తర్వాత.." అనే మూడు పదాల క్యాప్షన్‌ను జోడించాడు. ఈ సింపుల్ క్యాప్షనే అభిమానుల హృదయాలను హత్తుకుంది. దీంతో లైకులు, కామెంట్ల వర్షం కురుస్తోంది. సాధారణ అభిమానులతో పాటు పలువురు ప్రముఖులు, ఇతర క్రీడాకారులు కూడా ఈ జంటపై ప్రశంసలు కురిపిస్తున్నారు.

ఇటీవలే టీ20, టెస్ట్ క్రికెట్‌ ఫార్మాట్లకు విరాట్ కోహ్లీ వీడ్కోలు పలికిన సంగతి తెలిసిందే. ప్రస్తుతం కేవలం వన్డే క్రికెట్‌పైనే దృష్టి సారించిన కింగ్, త్వరలో ఆస్ట్రేలియాతో జరగబోయే వన్డే సిరీస్ కోసం సిద్ధమవుతున్నాడు. అంతకుముందు తన చివరి ఐపీఎల్ సీజన్‌లో రాయల్ ఛాలెంజర్స్ బెంగళూరు (ఆర్సీబీ) జట్టుకు తొలి టైటిల్ అందించి, తన చిరకాల స్వప్నాన్ని నెరవేర్చుకున్నాడు.