పాక్‌తో ఫైనల్‌కు ముందు టీమిండియాలో టెన్షన్.. హార్దిక్, అభిషేక్‌ల గాయాలపై బౌలింగ్ కోచ్ ఏమ‌న్నాడంటే..!

ఆదివారం పాకిస్థాన్‌తో జరగనున్న ఆసియా కప్ హై-వోల్టేజ్ ఫైనల్‌కు ముందు భారత జట్టులో నెలకొన్న గాయాల ఆందోళన తొలగిపోయింది. శ్రీలంకతో జరిగిన ఉత్కంఠభరిత మ్యాచ్‌లో కీలక ఆటగాళ్లు హార్దిక్ పాండ్యా, అభిషేక్ శర్మ మైదానం వీడటంతో వారి ఫిట్‌నెస్‌పై సందేహాలు తలెత్తాయి. అయితే, ఇవి తీవ్రమైన గాయాలు కావని, కేవలం కండరాలు పట్టేయడం (క్రాంప్స్) మాత్రమేనని భారత బౌలింగ్ కోచ్ మోర్నీ మోర్కెల్ స్పష్టం చేశాడు. దీంతో అభిమానులు, జట్టు యాజమాన్యం ఊపిరి పీల్చుకుంది.

శ్రీలంకతో మ్యాచ్‌లో తన తొలి ఓవర్ వేసిన వెంటనే హార్దిక్ పాండ్యా కండరాలు పట్టేయడంతో మైదానం నుంచి బయటకు వెళ్లాడు. ఆ తర్వాత అతను మళ్లీ ఫీల్డింగ్‌కు రాలేదు. తొమ్మిదో ఓవర్‌లో అభిషేక్ శర్మ కూడా ఇదే సమస్యతో ఇబ్బంది పడ్డాడు. వీరిద్దరి పరిస్థితిని వైద్య బృందం నిశితంగా పరిశీలిస్తోందని, ఆందోళన చెందాల్సిన అవసరం లేదని మోర్కెల్ మీడియా సమావేశంలో తెలిపాడు. "హార్దిక్‌కు క్రాంప్స్ వచ్చాయి. అతని పరిస్థితిని అంచనా వేసి తుది నిర్ణయం తీసుకుంటాం" అని ఆయన వివరించాడు.

ఫైనల్‌కు తక్కువ సమయం ఉండటంతో ఆటగాళ్ల రికవరీకే పూర్తి ప్రాధాన్యత ఇస్తున్నట్లు మోర్కెల్ వెల్లడించాడు. "శనివారం ఆటగాళ్లకు ఎటువంటి ట్రైనింగ్ సెషన్లు ఉండవు. వారికి పూర్తి విశ్రాంతి అవసరం. ఇప్పటికే ఐస్ బాత్ సెషన్లు ప్రారంభమయ్యాయి. మంచి నిద్ర, విశ్రాంతే వారిని తదుపరి మ్యాచ్‌కు సిద్ధం చేస్తాయి. వ్యక్తిగతంగా పూల్ సెషన్లు, మసాజ్‌లు ఏర్పాటు చేశాం. మానసికంగా, శారీరకంగా తుదిపోరుకు సిద్ధమవడం చాలా ముఖ్యం" అని ఆయన పేర్కొన్నాడు.

ఇదే సమయంలో శ్రీలంకతో మ్యాచ్‌లో ధారాళంగా పరుగులు సమర్పించిన యువ పేసర్లు అర్ష్‌దీప్ సింగ్, హర్షిత్ రాణాలకు మోర్కెల్ అండగా నిలిచాడు. "మా జట్టులో సాకులు చెప్పే సంస్కృతిని ప్రోత్సహించం. నెట్స్‌లో ఎంత కష్టపడ్డా, మ్యాచ్ ఆడిన అనుభవం వేరు. ప్రస్తుతం వారికి కలిసి రావడం లేదు. కానీ వాళ్లిద్దరూ మ్యాచ్‌లను మలుపు తిప్పగల సత్తా ఉన్న ఎక్స్-ఫ్యాక్టర్ ఆటగాళ్లు" అంటూ వారిపై ప్ర‌శంస‌లు కురిపించాడు.