చంద్రబాబు, నారా లోకేశ్ లకు కృతజ్ఞతలు తెలిపిన పవన్ కల్యాణ్

ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్, రాష్ట్ర గవర్నర్ ఎస్. అబ్దుల్ నజీర్, ముఖ్యమంత్రి చంద్రబాబు, మంత్రి నారా లోకేశ్ లకు సామాజిక మాధ్యమాల వేదికగా తన హృదయపూర్వక కృతజ్ఞతలు తెలియజేశారు. తన ఆరోగ్యంపై వారు చూపిన ఆందోళన, పంపిన శుభాకాంక్షలకు ఆయన ఈ మేరకు స్పందించారు.

గవర్నర్ అబ్దుల్ నజీర్ తన ఆరోగ్యంపై ఆందోళన వ్యక్తం చేయడంతో పాటు శుభాకాంక్షలు తెలిపారని, వారి ఆదరణకు మనస్ఫూర్తిగా ధన్యవాదాలు తెలుపుతున్నట్లు పవన్ కల్యాణ్ పేర్కొన్నారు.

అదేవిధంగా, ముఖ్యమంత్రి చంద్రబాబు తన ఆరోగ్యం గురించి వాకబు చేశారని పవన్ వెల్లడించారు. అంతటితో ఆగకుండా, తన తాజా చిత్రం ‘ఓజీ’ విజయం పట్ల ప్రత్యేకంగా అభినందనలు తెలిపారని పేర్కొన్నారు. ఈ ఆదరణ, అభినందనలకు గాను ముఖ్యమంత్రి చంద్రబాబుకు పవన్ ప్రత్యేకంగా కృతజ్ఞతలు తెలిపారు.

అలాగే, తన పట్ల ఆందోళన వ్యక్తం చేస్తూ పంపిన సందేశానికి గాను నారా లోకేశ్ కు కూడా పవన్ కల్యాణ్ ధన్యవాదాలు చెప్పారు. గత నాలుగు రోజులుగా వైరల్ జ్వరంతో బాధపడుతున్నపవన్ కల్యాణ్ త్వరగా కోలుకోవాలని పలువురు రాజకీయ, సినీ ప్రముఖులు ఆకాంక్షించిన విషయం తెలిసిందే. ఈ నేపథ్యంలోనే గవర్నర్, ముఖ్యమంత్రి, లోకేశ్ ల పరామర్శలకు పవన్ ఈ విధంగా స్పందించారు.