పాక్ ఆటగాళ్ల రెచ్చగొట్టే సంజ్ఞలు.. ఐసీసీకి ఫిర్యాదు చేసిన బీసీసీఐ

భారత్, పాకిస్థాన్ క్రికెట్ జట్ల మధ్య మైదానంలో ఉండే తీవ్రమైన వైరం ఇప్పుడు సరిహద్దులు దాటింది. ఇరు దేశాల క్రికెట్ బోర్డులు ఒకరి ఆటగాళ్లపై మరొకరు అంతర్జాతీయ క్రికెట్ మండలి (ఐసీసీ)కి అధికారికంగా ఫిర్యాదు చేసుకోవడంతో వివాదం కొత్త మలుపు తీసుకుంది. ఆటగాళ్ల ప్రవర్తన, వ్యాఖ్యల చుట్టూ ఈ వివాదం ముదురుతోంది.

దుబాయ్‌లో ఈ నెల 21న జరిగిన ఆసియా కప్ సూపర్-4 మ్యాచ్‌లో పాకిస్థాన్ క్రికెటర్లు హరీస్ రౌఫ్, సాహిబ్జాదా ఫర్హాన్ రెచ్చగొట్టే విధంగా ప్రవర్తించారని ఆరోపిస్తూ బీసీసీఐ.. ఐసీసీకి ఫిర్యాదు చేసింది. హరీస్ రౌఫ్ విమానం కూలిపోయినట్లు సైగలు చేయగా, ఫర్హాన్ తన బ్యాట్‌ను మెషిన్ గన్‌లా పట్టుకుని కాల్పులు జరుపుతున్నట్లు సంజ్ఞలు చేశాడని ఫిర్యాదులో పేర్కొంది. ఈ మేరకు బీసీసీఐ బుధవారం అధికారికంగా ఈ-మెయిల్ ద్వారా ఫిర్యాదు చేసినట్లు సమాచారం.

దీనికి ప్రతీకారంగా పాకిస్థాన్ క్రికెట్ బోర్డు (పీసీబీ) కూడా భారత కెప్టెన్ సూర్యకుమార్ యాదవ్‌పై ఐసీసీకి ఫిర్యాదు చేసినట్లు తెలుస్తోంది. ఈ నెల‌ 14న జరిగిన మ్యాచ్ అనంతరం, పహల్గామ్ ఉగ్రదాడి బాధితులకు సంఘీభావం తెలుపుతూ, ఆపరేషన్ సిందూర్‌లో పాల్గొన్న భారత సైన్యానికి తన జట్టు విజయాన్ని అంకితం ఇస్తున్నట్లు సూర్యకుమార్ చేసిన వ్యాఖ్యలు 'రాజకీయ ప్రేరేపితమైనవి' అని పీసీబీ ఆరోపించింది.

ఈ వివాదానికి ఆజ్యం పోస్తూ, ఆసియా క్రికెట్ కౌన్సిల్ (ఏసీసీ) ఛైర్మన్, పీసీబీ చీఫ్‌ మొహ్సిన్ నఖ్వీ సోషల్ మీడియాలో చేసిన ఒక పోస్ట్ మరింత దుమారం రేపింది. హరీస్ రౌఫ్ చేసిన సంజ్ఞను పోలి ఉండేలా, పోర్చుగల్ ఫుట్‌బాల్ దిగ్గజం క్రిస్టియానో రొనాల్డో విమానం కూలిపోతున్నట్లు సైగ చేస్తున్న వీడియోను ఆయన 'ఎక్స్'లో పోస్ట్ చేశారు. పాకిస్థాన్ అంతర్గత వ్యవహారాల మంత్రిగా కూడా ఉన్న నఖ్వీ ఇలాంటి పోస్ట్ చేయడం తీవ్ర చర్చనీయాంశమైంది.

ప్రస్తుతం ఈ ఫిర్యాదులపై ఐసీసీ విచారణ చేపట్టే అవకాశం ఉంది. ఆటగాళ్లు తమ ప్రవర్తనపై సరైన వివరణ ఇవ్వలేకపోతే, ఐసీసీ ప్రవర్తనా నియమావళి ప్రకారం వారిపై చర్యలు తీసుకునే సూచనలు కనిపిస్తున్నాయి. ఒకవేళ ఆరోపణలను ఆటగాళ్లు లిఖితపూర్వకంగా తిరస్కరిస్తే, ఐసీసీ ఎలైట్ ప్యానెల్ రిఫరీ రిచీ రిచర్డ్‌సన్ ముందు విచారణకు హాజరుకావాల్సి ఉంటుంది.