అనకాపల్లి జిల్లా రైవాడ కాలువ వద్ద కింగ్ కోబ్రా కలకలం... వీడియో ఇదిగో!

అనకాపల్లి జిల్లాలోని దేవరాపల్లి మండలంలో ఓ కింగ్ కోబ్రా స్థానికంగా కలకలం రేపింది. జనావాసాలకు సమీపంలోని కాలువలో భారీ విషసర్పాన్ని చూసిన ప్రజలు భయంతో పరుగులు తీశారు. చివరకు ఓ వన్యప్రాణి సంరక్షకుడు రెండు గంటల పాటు శ్రమించి దాన్ని సురక్షితంగా బంధించడంతో అందరూ ఊపిరి పీల్చుకున్నారు.

వివరాల్లోకి వెళితే, దేవరాపల్లి మండలంలోని రైవాడ కాలువలో ఓ భారీ రాచనాగు (కింగ్ కోబ్రా) సంచరిస్తుండటాన్ని స్థానిక ప్రజలు గమనించారు. దాని పరిమాణం చూసి తీవ్ర భయాందోళనకు గురైన వారు వెంటనే ఈస్టర్న్ ఘాట్స్ వైల్డ్ లైఫ్ సొసైటీ సభ్యుడైన కృష్ణకు సమాచారం అందించారు. హుటాహుటిన ఘటనా స్థలానికి చేరుకున్న ఆయన, పామును పట్టుకునేందుకు ప్రయత్నాలు ప్రారంభించారు.

దాదాపు రెండు గంటల పాటు తీవ్రంగా శ్రమించిన కృష్ణ, ఎట్టకేలకు గిరినాగును చాకచక్యంగా బంధించారు. అనంతరం అటవీ శాఖ అధికారులకు సమాచారం ఇవ్వగా, వారి పర్యవేక్షణలో ఆ గిరినాగును సమీపంలోని రిజర్వ్ ఫారెస్ట్ ప్రాంతంలో సురక్షితంగా విడిచిపెట్టారు. దీంతో స్థానిక గ్రామస్థులు అధికారులకు, కృష్ణకు కృతజ్ఞతలు తెలిపారు.