పాకిస్థాన్‌లో సొంతింటి ఫీలింగ్.. రాహుల్ సన్నిహితుడు పిట్రోడా వ్యాఖ్యలతో రాజకీయ దుమారం

కాంగ్రెస్ పార్టీ సీనియర్ నేత, రాహుల్ గాంధీకి అత్యంత సన్నిహితుడిగా పేరున్న శామ్ పిట్రోడా చేసిన వ్యాఖ్యలు జాతీయ రాజకీయాల్లో తీవ్ర దుమారం రేపుతున్నాయి. పాకిస్థాన్‌లో పర్యటించినప్పుడు తనకు సొంత ఇంట్లో ఉన్నట్లే అనిపించిందని ఆయన చెప్పడంపై బీజేపీ తీవ్ర స్థాయిలో మండిపడింది.

భారత విదేశాంగ విధానం పొరుగు దేశాలతో సంబంధాలను మెరుగుపరుచుకోవడంపై దృష్టి సారించాలని పిట్రోడా అభిప్రాయపడ్డారు. ఈ క్రమంలో పాకిస్థాన్‌తో పాటు బంగ్లాదేశ్, నేపాల్ వంటి దేశాలతో చర్చలు జరపాల్సిన అవసరాన్ని ఆయన నొక్కిచెప్పారు. "నేను పాకిస్థాన్‌కు వెళ్లాను, బంగ్లాదేశ్‌కు, నేపాల్‌కు కూడా వెళ్లాను. ఆ దేశాల్లో ఉన్నప్పుడు నాకు విదేశంలో ఉన్నట్లు అనిపించలేదు, నా సొంత ఇంట్లో ఉన్నట్లే భావించాను" అని ఆయన అన్నారు.

పిట్రోడా వ్యాఖ్యలపై బీజేపీ అధికార ప్రతినిధి ప్రదీప్ భండారీ ఘాటుగా స్పందించారు. రాహుల్ గాంధీకి అత్యంత ఇష్టమైన వ్యక్తి పాకిస్థాన్‌ను సొంత ఇల్లుగా భావిస్తున్నారని, బహుశా అందుకే 26/11 ముంబై దాడుల తర్వాత నాటి యూపీఏ ప్రభుత్వం పాక్‌పై కఠిన చర్యలు తీసుకోలేదేమోనని ఆయన విమర్శించారు. "పాకిస్థాన్‌కు ఇష్టమైన పార్టీ కాంగ్రెస్ పార్టీ" అంటూ ఆయన తీవ్ర ఆరోపణలు చేశారు. పిట్రోడా వ్యాఖ్యలు కాంగ్రెస్ పార్టీ వైఖరిని బయటపెడుతున్నాయని, దేశ జాతీయ ప్రయోజనాలను దెబ్బతీసేలా ఉన్నాయని బీజేపీ నేతలు ఆక్షేపిస్తున్నారు. ఈ వ్యాఖ్యలతో ఇరు పార్టీల మధ్య మరోసారి మాటల యుద్ధం మొదలైంది.