మోదీ సర్కార్‌పై అఫ్రిది విమర్శలు.. రాహుల్ గాంధీపై ప్రశంసలు

పాకిస్థాన్ మాజీ క్రికెటర్ షాహిద్ అఫ్రిది భారత రాజకీయాలపై సంచలన వ్యాఖ్యలు చేశాడు. ప్రధాని నరేంద్ర మోదీ నేతృత్వంలోని ప్రభుత్వాన్ని విమర్శిస్తూనే, కాంగ్రెస్ నేత రాహుల్ గాంధీపై ప్రశంసలు కురిపించాడు. దుబాయ్‌లో జరిగిన ఆసియా కప్ మ్యాచ్‌లో పాక్ ఆటగాళ్లతో కరచాలనం చేయడానికి భారత ఆటగాళ్లు నిరాకరించిన వివాదంపై అఫ్రిది స్పందించాడు.

మోదీ ప్రభుత్వం అధికారంలోకి రావడానికే హిందూ-ముస్లిం కార్డు వాడుతోందని అఫ్రిది ఆరోపించాడు. "నేను ఈ విషయాన్ని పదే పదే చెబుతున్నాను. ఇది చాలా చెడు మనస్తత్వం" అని వ్యాఖ్యానించాడు. బీజేపీ అధికారంలో ఉన్నంత కాలం ఇలాంటి పరిస్థితులు కొనసాగుతాయని అభిప్రాయపడ్డాడు.

అదే సమయంలో రాహుల్ గాంధీని అఫ్రిది ఆకాశానికెత్తేశాడు. "రాహుల్ గాంధీకి సానుకూల దృక్పథం ఉంది. ఆయన చర్చల ద్వారా అందరితో కలిసి ముందుకు సాగాలని కోరుకుంటున్నారు" అని ప్రశంసించాడు. పాకిస్థాన్‌తో చర్చలకు రాహుల్ గాంధీ సుముఖంగా ఉన్నారని పేర్కొన్నాడు.

ఆసియా కప్ మ్యాచ్‌లో పాక్ ఆటగాళ్లతో కరచాలనం చేసేందుకు భారత ఆటగాళ్లు నిరాకరించడమే ఈ వివాదానికి మూల కారణం. దీనిపై అఫ్రిది స్పందిస్తూ, భారత ఆటగాళ్లను తాను తప్పుపట్టడం లేదని అన్నాడు. ఏప్రిల్ 22న పహల్గామ్‌లో జరిగిన ఉగ్రదాడి తర్వాత భారత్‌లో తీవ్ర వ్యతిరేకత వ్యక్తమైందని, మ్యాచ్‌ను బహిష్కరించాలంటూ సోషల్ మీడియాలో పెద్ద ఎత్తున ఒత్తిడి వచ్చిందని గుర్తుచేశాడు. "ప్రజల నుంచి తీవ్ర ఒత్తిడి ఉన్నందున, బీసీసీఐ మా ఆటగాళ్లతో కరచాలనం చేయవద్దని భారత ఆటగాళ్లను ఆదేశించి ఉండవచ్చు. వారికి పై నుంచి ఆదేశాలు వచ్చాయి!" అని పేర్కొన్నాడు.