భారత్ దారికొస్తోంది... మరోసారి నోరు పారేసుకున్న నవారో

భారత్-అమెరికా మధ్య కీలక వాణిజ్య చర్చలు జరగడానికి ఒక రోజు ముందు, వైట్‌హౌస్ ఉన్నతాధికారి నుంచి తీవ్రమైన వ్యాఖ్యలు వెలువడ్డాయి. ఎట్టకేలకు భారత్ దారికొస్తోందని అని ట్రంప్ వాణిజ్య సలహాదారు పీటర్ నవారో నోరుపారేసుకున్నారు. భారత్‌ను 'టారిఫ్‌ల మహారాజు' అని అభివర్ణించిన నవారో, వాణిజ్య చర్చల విషయంలో భారత్ తన వైఖరి మార్చుకోకపోతే తీవ్ర పరిణామాలు ఎదుర్కోవలసి వస్తుందని హెచ్చరించారు. నవారో ఇటీవల భారత్ పై తరచుగా దురుసు వ్యాఖ్యలు చేస్తున్నారు. 

'రియల్ అమెరికాస్ వాయిస్' అనే షోలో మాట్లాడిన నవారో, "ప్రపంచంలోని ప్రధాన దేశాల్లో అమెరికాపై అత్యధిక సుంకాలు విధిస్తున్నది భారతే. ఈ విషయాన్ని మేం కచ్చితంగా పరిష్కరించుకోవాలి" అని అన్నారు. అంతేకాకుండా, రష్యా-ఉక్రెయిన్ యుద్ధం తర్వాత భారత్ చౌకగా రష్యా చమురు కొనుగోలు చేస్తూ లాభాలు గడిస్తోందని, దీనివల్ల అమెరికా పన్ను చెల్లింపుదారులు యుద్ధం కోసం మరింత డబ్బు పంపాల్సి వస్తోందని ఆయన ఆరోపించారు.

మంగళవారం నాడు ఢిల్లీలో భారత్, అమెరికా మధ్య వాణిజ్య చర్చలు జరగనున్నాయి. ఈ చర్చలను వేగవంతం చేసేందుకు ఇరు పక్షాలు అంగీకరించాయని భారత వాణిజ్య మంత్రిత్వ శాఖ ప్రత్యేక కార్యదర్శి, ముఖ్య సంధానకర్త రాజేష్ అగర్వాల్ ధృవీకరించారు. ఈ చర్చల కోసం దక్షిణాసియాలో అమెరికా వాణిజ్య ప్రతినిధి బ్రెండన్ లించ్ ఒక రోజు పర్యటనపై ఢిల్లీకి రానున్నారు.

గత నెలలో రష్యా నుంచి ముడిచమురు దిగుమతులు తగ్గించుకోవడానికి భారత్ నిరాకరించిందన్న కారణంతో, భారత ఎగుమతులపై అమెరికా అధ్యక్షుడు డొనాల్డ్ ట్రంప్ సుంకాలను 50 శాతానికి పెంచిన విషయం తెలిసిందే. దీంతో ఆగస్టులో భారత ఎగుమతులు తొమ్మిది నెలల కనిష్ఠ స్థాయికి పడిపోయాయి. అయితే, ఇటీవలే ప్రధాని మోదీని 'గొప్ప ప్రధాని' అని ట్రంప్ ప్రశంసించడం, దానికి మోదీ సానుకూలంగా స్పందించడం వంటి పరిణామాలు ఇరు దేశాల మధ్య సంబంధాలు మెరుగుపడే అవకాశం ఉందని సూచిస్తున్నాయి. ఈ నేపథ్యంలో జరగబోయే వాణిజ్య చర్చలు ప్రాధాన్యత సంతరించుకున్నాయి.