ఆసియా కప్ లో ఆ రెండు మ్యాచ్ లు మావే: పాక్ పేసర్ హరీస్ రవూఫ్

యూఏఈలో జరగనున్న ఆసియా కప్ టీ20 టోర్నమెంట్‌లో భారత్‌తో జరిగే హై-వోల్టేజ్ మ్యాచ్‌లో పాకిస్థాన్ విజయం సాధిస్తుందని ఆ జట్టు ఫాస్ట్ బౌలర్ హరీస్ రౌఫ్ ధీమాగా ప్రకటించాడు. సెప్టెంబర్ 9 నుంచి 28 వరకు అబుదాబి, దుబాయ్‌లలో జరిగే ఈ ఎనిమిది జట్ల టోర్నమెంట్‌లో పాకిస్థాన్, భారత్, ఒమన్, యూఏఈలతో కలిసి గ్రూప్ 'ఏ'లో ఉంది.

పాకిస్థాన్ తమ ఆసియా కప్ ప్రచారాన్ని సెప్టెంబర్ 12న దుబాయ్‌లో ఒమన్‌తో మ్యాచ్‌తో ప్రారంభిస్తుంది, ఆ తర్వాత సెప్టెంబర్ 14న దుబాయ్ ఇంటర్నేషనల్ క్రికెట్ స్టేడియంలో భారత్‌తో తలపడనుంది. సోషల్ మీడియాలో వైరల్ అవుతున్న ఒక వీడియోలో హరీస్ రవూఫ్, "దోనో అప్నే హై, ఇన్‌షా అల్లా (, దేవుని కృపతో రెండు మ్యాచ్‌లు మావే)" అని ధీమాగా చెప్పాడు. తద్వారా భారత్ ను ఓడిస్తామని పరోక్షంగా స్పష్టం చేశాడు.

ఆశ్చర్యకరంగా, ఈసారి పాకిస్థాన్ జట్టు కెప్టెన్‌గా సల్మాన్ ఆఘాను నియమించారు, అయితే స్టార్ బ్యాట్స్‌మన్ బాబర్ అజామ్, వికెట్ కీపర్ మహమ్మద్ రిజ్వాన్‌లను జట్టు నుంచి తప్పించారు. షహీన్ షా ఆఫ్రిది, హరీస్ రౌఫ్, మహమ్మద్ వసీమ్ జూనియర్, సల్మాన్ మిర్జాతో కూడిన పేస్ బౌలింగ్ యూనిట్‌ ఏ మేరకు రాణిస్తుందో చూడాలి. స్పిన్ బౌలింగ్‌ను అబ్రార్ అహ్మద్, మహమ్మద్ నవాజ్, సుఫ్యాన్ మొకిమ్, ఖుష్దిల్ షా నడిపిస్తారు.

ఈ హై-ఓల్టేజ్ భారత్-పాకిస్థాన్ మ్యాచ్ క్రీడాభిమానుల్లో ఉత్కంఠను రేకెత్తిస్తోంది.