ఎన్‌ఎస్‌జీ కమాండోలను ఎలా ఎంపిక చేస్తారో తెలుసా?

దేశ భద్రతకే వన్నె తెచ్చే దళాల్లో నేషనల్ సెక్యూరిటీ గార్డ్ (ఎన్‌ఎస్‌జీ) ఒకటి. 'బ్లాక్ క్యాట్స్'గా పేరుగాంచిన ఈ కమాండోలుగా మారడం ఎందరో యువతకు ఒక కల. ఉగ్రవాద వ్యతిరేక చర్యల్లో ప్రత్యేక శిక్షణ పొందిన ఈ దళం, దేశంలోని అత్యంత కీలకమైన భద్రతా విభాగాల్లో ఒకటిగా పనిచేస్తుంది. అయితే, ఈ దళంలో చేరాలంటే కొన్ని ప్రత్యేక అర్హతలు, కఠినమైన ఎంపిక ప్రక్రియను దాటాల్సి ఉంటుంది. గతలంలో వీఐపీల భద్రతలోనూ ఎన్‌ఎస్‌జీ కమాండోలది కీలక పాత్ర.

అర్హతలు 
ఎన్‌ఎస్‌జీలో చేరాలనుకునే వారు ముందుగా భారత సైనిక దళాలు (ఆర్మీ, నేవీ, ఎయిర్ ఫోర్స్) లేదా కేంద్ర సాయుధ పోలీసు బలగాల్లో (సీఏపీఎఫ్) పనిచేస్తూ ఉండాలి. సీఆర్పీఎఫ్, బీఎస్ఎఫ్, ఐటీబీపీ, సీఐఎస్ఎఫ్ వంటి విభాగాల నుంచి కూడా అభ్యర్థులు దరఖాస్తు చేసుకోవచ్చు. కనీసం మూడేళ్ల సర్వీస్ అనుభవం తప్పనిసరి. అభ్యర్థుల వయసు 35 ఏళ్లు మించకూడదు. గుర్తింపు పొందిన యూనివర్సిటీ నుంచి డిగ్రీ పూర్తి చేసి ఉండటంతో పాటు, శారీరకంగా, మానసికంగా అత్యంత దృఢంగా ఉండాలి.

ఎంపిక ప్రక్రియ 
ఎన్‌ఎస్‌జీలో నేరుగా నియామకాలు ఉండవు. సైన్యం, సీఏపీఎఫ్ దళాల నుంచి డిప్యుటేషన్ పద్ధతిలో కమాండోలను ఎంపిక చేస్తారు. ఆసక్తి, అర్హత ఉన్న వారి నుంచి దరఖాస్తులు స్వీకరించి, కఠినమైన ఎంపిక ప్రక్రియను ప్రారంభిస్తారు. ఈ ప్రక్రియ పలు దశల్లో ఉంటుంది.

శిక్షణ 
తొలి దశ: ఎంపికైన వారికి ప్రాథమిక శిక్షణలో ఆయుధాల వినియోగం, పోరాట పటిమపై దృష్టి పెడతారు. ఈ దశలోనే అభ్యర్థుల మానసిక స్థైర్యాన్ని, శారీరక సామర్థ్యాన్ని తీవ్రంగా పరీక్షిస్తారు. ఇది చాలా కఠినంగా ఉంటుంది.

రెండో దశ: ప్రాథమిక దశలో నిలిచిన వారికి రెండో దశ శిక్షణ ఉంటుంది. ఈ దశలో ఉగ్రవాద వ్యతిరేక ఆపరేషన్లు, బందీల విముక్తి, బాంబు నిర్వీర్యం, స్నైపర్ షూటింగ్ వంటి అత్యంత కీలకమైన అంశాల్లో ప్రత్యేక తర్ఫీదు ఇస్తారు. పట్టణ, గ్రామీణ ప్రాంతాల్లో ఆపరేషన్లు నిర్వహించేలా వారిని తీర్చిదిద్దుతారు.

తుది పరీక్ష: శిక్షణ మొత్తం పూర్తయ్యాక, వారి నైపుణ్యాలను పరీక్షించేందుకు ఒక మాక్ ఆపరేషన్ నిర్వహిస్తారు. ఈ చివరి పరీక్షలో విజయవంతంగా ఉత్తీర్ణులైన వారే 'బ్లాక్ క్యాట్' కమాండోలుగా దేశ సేవలో అడుగుపెడతారు.

దేశ భద్రతలో అత్యంత కీలకమైన బాధ్యతలు నిర్వర్తించే ఎన్‌ఎస్‌జీ, సాహసోపేతమైన యువతకు గొప్ప అవకాశాన్ని అందిస్తోంది.