గిల్‌కు వైస్ కెప్టెన్సీ.. సునీల్‌ గవాస్కర్ కీలక వ్యాఖ్యలు

టీమిండియా యువ బ్యాటర్ శుభ్‌మన్ గిల్‌పై భార‌త‌ దిగ్గజం సునీల్ గవాస్కర్ ప్రశంసల వర్షం కురిపించారు. త్వరలో జరగనున్న ఆసియా కప్ 2025 టోర్నీకి గిల్‌ను వైస్ కెప్టెన్‌గా నియమించడం సరైన నిర్ణయమని ఆయన అభిప్రాయపడ్డారు. భవిష్యత్తులో భారత జట్టును మూడు ఫార్మాట్లలో నడిపించగల సత్తా గిల్‌కు ఉందని, ఈ నియామకం ఆ దిశగా వేసిన తొలి అడుగేనని ఆయన పేర్కొన్నాడు.

ఇటీవల ఇంగ్లండ్‌తో జరిగిన టెస్ట్ సిరీస్‌లో గిల్ అద్భుతంగా రాణించిన విషయాన్ని గవాస్కర్ గుర్తుచేశారు. "కొన్ని వారాల క్రితమే గిల్ ఇంగ్లండ్‌లో 750కి పైగా పరుగులు సాధించాడు. అంతటి ఫామ్‌లో ఉన్న ఆటగాడిని పక్కన పెట్టలేం. తొలిసారి కెప్టెన్సీ బాధ్యతలు చేపట్టినా ఒత్తిడిని తట్టుకుని జట్టును నడిపించిన తీరు అమోఘం. అతడికి వైస్-కెప్టెన్సీ ఇవ్వడం ద్వారా, భవిష్యత్తులో టీ20 జట్టుకు నాయకత్వం వహించేది తనే అనే స్పష్టమైన సంకేతాలు పంపారు. ఇది చాలా మంచి ఎంపిక" అని గవాస్కర్ ఇండియా టుడేతో అన్నారు.

సెప్టెంబర్ 9 నుంచి 28 వరకు అబుదాబి, దుబాయ్ వేదికగా ఆసియా కప్ జరగనుంది. ఈ టోర్నీకి సూర్యకుమార్ యాదవ్ కెప్టెన్‌గా వ్యవహరించనున్నాడు. గతేడాది టీ20 ప్రపంచకప్ తర్వాత జట్టుకు దూరమైన స్టార్ పేసర్ జస్ప్రీత్ బుమ్రా, స్పిన్నర్ కుల్దీప్ యాదవ్ తిరిగి జట్టులోకి రావడం బలాన్ని పెంచింది. చీఫ్ సెలెక్టర్ అజిత్ అగార్కర్ బీసీసీఐ ప్రధాన కార్యాలయంలో జరిగిన మీడియా సమావేశంలో ఈ జట్టును ప్రకటించాడు.

డిఫెండింగ్ ఛాంపియన్‌గా బరిలోకి దిగుతున్న భారత్‌తో పాటు గ్రూప్ ‘ఏ’లో పాకిస్థాన్, ఒమన్, యూఏఈ ఉన్నాయి. సెప్టెంబర్ 10న యూఏఈతో తొలి మ్యాచ్ ఆడనున్న టీమిండియా, సెప్టెంబర్ 14న దాయాది పాకిస్థాన్‌తో తలపడనుంది.

ఆసియా కప్‌కు భారత జట్టు:
సూర్యకుమార్ యాదవ్ (కెప్టెన్), శుభ్‌మన్ గిల్ (వైస్ కెప్టెన్), అభిషేక్ శర్మ, తిలక్ వర్మ, హార్దిక్ పాండ్యా, శివమ్ దూబే, అక్షర్ పటేల్, జితేశ్ శర్మ (వికెట్ కీపర్), జస్ప్రీత్ బుమ్రా, అర్ష్‌దీప్ సింగ్, వరుణ్ చక్రవర్తి, కుల్దీప్ యాదవ్, సంజూ శాంసన్ (వికెట్ కీపర్), హర్షిత్ రాణా, రింకూ సింగ్.

స్టాండ్‌బై ప్లేయ‌ర్లు: ప్రసిధ్ కృష్ణ, వాషింగ్టన్ సుందర్, ధ్రువ్ జురెల్, రియాన్ పరాగ్, యశస్వి జైస్వాల్.