బ్రాడ్‌మన్ రికార్డులకు గిల్ గురి.. చరిత్రకు అడుగు దూరంలో టీమిండియా కెప్టెన్!

ఇంగ్లండ్‌తో జరుగుతున్న ఐదు మ్యాచ్‌ల టెస్ట్ సిరీస్‌లో భారత కెప్టెన్ శుభ్‌మన్ గిల్ పరుగుల వరద పారిస్తున్నాడు. ఇప్పటికే తొలి రెండు మ్యాచ్‌లలోనే 585 పరుగులు సాధించి అద్భుతమైన ఫామ్‌లో ఉన్నాడు. ఇదే జోరు కొనసాగిస్తే, క్రికెట్ చరిత్రలో ఎన్నో ఏళ్లుగా చెక్కుచెదరకుండా ఉన్న సర్ డొనాల్డ్ బ్రాడ్‌మన్ రికార్డులను బద్దలు కొట్టడం ఖాయం.

క్రికెట్ దిగ్గజం బ్రాడ్‌మన్ 88 ఏళ్ల క్రితం 1936-37 యాషెస్ సిరీస్‌లో కెప్టెన్‌గా 810 పరుగులు సాధించాడు. ఒక సిరీస్‌లో ఒక కెప్టెన్ సాధించిన అత్యధిక పరుగుల రికార్డుగా ఇది ఇప్పటికీ పదిలంగా ఉంది. ఈ రికార్డును అధిగమించడానికి గిల్‌కు ఇంకా ఆరు ఇన్నింగ్స్‌లు ఉండగా, కేవలం 226 పరుగులు చేస్తే ఆ రికార్డు బద్దలవుతుంది. అలాగే, ఒకే సిరీస్‌లో అత్యధిక పరుగుల రికార్డు (974) కూడా బ్రాడ్‌మన్ పేరిటే ఉంది. దాన్ని అందుకోవాలంటే గిల్‌కు మరో 390 పరుగులు అవసరం.

ఇవే కాకుండా, టెస్టుల్లో అత్యంత వేగంగా వెయ్యి పరుగులు పూర్తి చేసిన కెప్టెన్‌గా బ్రాడ్‌మన్ (11 ఇన్నింగ్స్‌లు) రికార్డును కూడా గిల్ బద్దలు కొట్టేలా ఉన్నాడు. ఇప్పటికే నాలుగు ఇన్నింగ్స్‌లలోనే 585 పరుగులు చేయడం విశేషం. మరోవైపు, ఒకే సిరీస్‌లో అత్యధిక సెంచరీల రికార్డు కూడా గిల్‌ను ఊరిస్తోంది. కెప్టెన్‌గా బ్రాడ్‌మన్ పేరిట ఉన్న నాలుగు సెంచరీల రికార్డును సమం చేయడానికి గిల్‌కు ఒక సెంచరీ, వెస్టిండీస్ దిగ్గజం క్లైడ్ వాల్కాట్ పేరిట ఉన్న ఐదు సెంచరీల రికార్డును సమం చేయడానికి రెండు సెంచరీలు అవసరం.

టెస్ట్ క్రికెట్ చరిత్రలో ఇప్పటివరకు ఏ ఆటగాడూ ఒకే సిరీస్‌లో 1000 పరుగులు చేయలేదు. ఈ అసాధారణ ఫీట్‌ను సాధించే సువర్ణావకాశం ఇప్పుడు గిల్ ముందుంది. లార్డ్స్‌లో జరగనున్న మూడో టెస్టుతో పాటు మిగిలిన మ్యాచ్‌లలో గిల్ ఎలా రాణిస్తాడోనని క్రికెట్ ప్రపంచం ఆసక్తిగా ఎదురుచూస్తోంది.