ఇది హనీమూన్ పీరియడ్ మాత్రమే.. గిల్ కెప్టెన్సీపై గంగూలీ ఆసక్తికర వ్యాఖ్యలు

టీమిండియా టెస్టు కెప్టెన్‌గా శుభ్‌మన్ గిల్ అద్భుతమైన ఆరంభాన్ని అందుకున్నప్పటికీ, ఇది హనీమూన్ దశ మాత్రమేనని, అసలు ఒత్తిడి ముందుందని భారత మాజీ కెప్టెన్ సౌరవ్ గంగూలీ అన్నాడు. కెప్టెన్‌గా గిల్ అద్భుతంగా రాణిస్తున్నాడని, అయితే రాబోయే మ్యాచ్‌లలో సవాళ్లు పెరుగుతాయని ఆయన అభిప్రాయపడ్డాడు. మంగళవారం తన 53వ పుట్టినరోజు సందర్భంగా ఈడెన్ గార్డెన్స్‌లో గంగూలీ మీడియాతో మాట్లాడాడు.

ఇంగ్లండ్‌తో జరుగుతున్న టెస్టు సిరీస్‌లో కెప్టెన్‌గా గిల్ అసాధారణ ప్రదర్శన చేస్తున్నాడు. తొలి రెండు టెస్టుల్లోనే మూడు సెంచరీలు (ఒక డబుల్ సెంచరీతో సహా) బాది, ఏకంగా 146.25 సగటుతో 585 పరుగులు సాధించాడు. అతని నాయకత్వంలోనే ఎడ్జ్‌బాస్టన్‌లో భారత్ 336 పరుగుల భారీ తేడాతో గెలిచి, ఐదు మ్యాచ్‌ల సిరీస్‌ను 1-1తో సమం చేసింది.

ఈ సందర్భంగా గిల్ బ్యాటింగ్‌ను ప్రశంసించిన గంగూలీ, "నేను చూసినంతలో గిల్ అత్యుత్తమంగా బ్యాటింగ్ చేస్తున్నాడు. ఇందులో ఆశ్చర్యం లేదు. అయితే, కెప్టెన్‌గా ఇది అతనికి హనీమూన్ పీరియడ్ లాంటిది. కాలం గడిచేకొద్దీ ఒత్తిడి పెరుగుతుంది. రాబోయే మూడు టెస్టుల్లో అసలైన ఒత్తిడి ఉంటుంది" అని హెచ్చరించాడు.

భారత క్రికెట్‌లో ప్రతిభకు కొదవలేదని, గవాస్కర్, సచిన్, ద్రవిడ్ వంటి దిగ్గజాల తర్వాత కోహ్లీ, ఇప్పుడు గిల్, జైస్వాల్ వంటి యువకులు తమ స్థానాలను భర్తీ చేస్తున్నారని గంగూలీ అన్నాడు. సిరీస్ ఇంకా మిగిలే ఉందని, లార్డ్స్‌లో జరిగే తదుపరి మ్యాచ్‌లో భారత్ మళ్లీ మొదటి నుంచి ప్రారంభించాలని దాదా సూచించాడు.