పాకిస్థాన్ ఆటగాడి తల పొగరు... వీడియో చూడండి!

కజకిస్థాన్‌లోని షైమ్‌కెంట్‌లో జరిగిన జూనియర్ డెవిస్ కప్ (అండర్-16) టెన్నిస్ టోర్నమెంట్‌లో భారత యువ క్రీడాకారులు పాకిస్థాన్‌పై అద్భుత విజయాన్ని నమోదు చేశారు. మే 24న జరిగిన ఈ పోరులో భారత్ 2-0 తేడాతో పాకిస్థాన్‌ను చిత్తు చేసింది. అయితే, ఈ విజయం తర్వాత మూడు రోజులకు, అంటే మే 27న, ఒక వీడియో వెలుగులోకి రావడంతో వివాదం రాజుకుంది. ఈ వీడియోలో పాకిస్తాన్ ఆటగాడు ఒకరు భారత ఆటగాడితో క్రీడాస్ఫూర్తికి విరుద్ధంగా షేక్‌హ్యాండ్ ఇచ్చినట్లు కనిపిస్తోంది.

వివరాల్లోకి వెళితే, భారత ఆటగాళ్లు ప్రకాశ్ శరణ్, తావిష్ పహ్వా తమ తమ సింగిల్స్ మ్యాచ్‌లలో సూపర్ టైబ్రేక్‌ల ద్వారా గెలిచి జట్టుకు తిరుగులేని ఆధిక్యాన్ని అందించారు. దీంతో భారత్ 2-0 తేడాతో పాకిస్థాన్‌పై విజయం సాధించింది.

అయితే, మ్యాచ్ ముగిసిన అనంతరం జరిగిన షేక్‌హ్యాండ్ సందర్భంగా ఒక పాకిస్థానీ ఆటగాడు ప్రవర్తించిన తీరు వివాదాస్పదంగా మారింది. మంగళవారం బయటకు వచ్చిన వీడియోలో, పాకిస్థాన్ ఆటగాడు మొదట షేక్‌హ్యాండ్ ఇవ్వకుండా వెళ్లిపోయి, ఆ తర్వాత రెండో ప్రయత్నంలో భారత ఆటగాడి చేతిని తాకి, వెంటనే అగౌరవంగా వెనక్కి లాక్కున్నట్లు స్పష్టంగా కనిపించింది. ఈ సంఘటన జరిగినప్పుడు భారత ఆటగాడు మాత్రం సంయమనం పాటిస్తూ, ఎలాంటి ఆవేశానికి లోనుకాకుండా ప్రశాంతంగా ఉండటం గమనార్హం.

ఈ షేక్‌హ్యాండ్ వివాదం భారత్, పాకిస్థాన్ మధ్య నెలకొన్న ఉద్రిక్తతల నేపథ్యంలో మరింత ప్రాధాన్యతను సంతరించుకుంది.