పవన్ కల్యాణ్ 'ఓజీ' రిలీజ్ డేట్ ఇదే... మార్క్ చేసుకోండి!

టాలీవుడ్ పవర్ స్టార్, ఏపీ ఉప ముఖ్యమంత్రి పవన్ కల్యాణ్ అభిమానులు ఎంతో ఆసక్తిగా ఎదురుచూస్తున్న ‘ఓజీ’ (ఒరిజినల్ గ్యాంగ్‌స్టర్) సినిమా విడుదల తేదీని చిత్ర నిర్మాణ సంస్థ డీవీవీ ఎంటర్‌టైన్‌మెంట్ అధికారికంగా ప్రకటించింది. ఈ యాక్షన్ థ్రిల్లర్‌ను సెప్టెంబర్ 25న దసరా పండుగ కానుకగా ప్రేక్షకుల ముందుకు తీసుకురానున్నట్లు వెల్లడించింది. ఈ వార్తతో పవన్ కల్యాణ్ అభిమానుల్లో కొత్త ఉత్సాహం నెలకొంది.

‘ఓజీ’ సినిమాకు యువ దర్శకుడు సుజీత్ దర్శకత్వం వహిస్తున్నారు. సుజీత్ గతంలో ‘సాహో’ వంటి భారీ బడ్జెట్ చిత్రాన్ని తెరకెక్కించారు. ‘ఓజీ’ సినిమా ప్రకటన వచ్చినప్పటి నుంచి దీనిపై భారీ అంచనాలు ఉన్నాయి. తాజాగా విడుదల తేదీని ప్రకటిస్తూ, "ఫైరింగ్‌ వరల్డ్‌ 25 సెప్టెంబరు 25" అంటూ చిత్ర యూనిట్ ఒక ఆసక్తికరమైన పోస్టర్‌ను పంచుకుంది. దీంతో అభిమానులు సోషల్ మీడియా వేదికగా తమ ఆనందాన్ని వ్యక్తం చేస్తున్నారు.

ప్రస్తుతం పవన్ కల్యాణ్ ఒకవైపు రాజకీయాల్లో చురుగ్గా ఉంటూనే, మరోవైపు తాను కమిట్ అయిన సినిమాలను పూర్తి చేసే పనిలో నిమగ్నమయ్యారు. ఇటీవలే ఆయన ‘హరి హర వీరమల్లు’ సినిమా షూటింగ్‌ను పూర్తిచేశారు. ఆ వెంటనే ‘ఓజీ’ చిత్రీకరణలో తిరిగి పాల్గొన్నారు. ఈ విషయాన్ని చిత్ర బృందం కూడా కొద్ది రోజుల క్రితం అధికారికంగా తెలియజేసింది. సినిమాను వీలైనంత వేగంగా పూర్తి చేసి, అనుకున్న సమయానికి విడుదల చేయాలని డీవీవీ ఎంటర్‌టైన్‌మెంట్ సంస్థ ప్రణాళికలు రచిస్తోంది.

ఇప్పటికే విడుదలైన ‘ఓజీ’ టీజర్ సినిమాపై అంచనాలను అమాంతం పెంచేసింది. పవన్ కల్యాణ్ లుక్, టీజర్‌లోని యాక్షన్ సన్నివేశాలు ప్రేక్షకులను విశేషంగా ఆకట్టుకున్నాయి. ఈ నేపథ్యంలో సినిమా విడుదల కోసం అభిమానులు ఉత్కంఠగా ఎదురుచూస్తున్నారు. దసరా పండుగ సీజన్‌లో విడుదల కానుండటంతో బాక్సాఫీస్ వద్ద ‘ఓజీ’ సంచలనాలు సృష్టించడం ఖాయమని సినీ వర్గాలు అంచనా వేస్తున్నాయి.