Lahore explosions: పాకిస్థాన్ లాహోర్ లో వరుస పేలుళ్లు... తీవ్ర భయాందోళనల్లో లాహోర్ ప్రజలు
- వాల్టన్ రోడ్‌లోని సైనిక విమానాశ్రయం వెలుపల ఘటన
- భయంతో జనం పరుగులు, లాహోర్ అంతర్జాతీయ విమానాశ్రయం మూసివేత
- ఘటనా స్థలానికి అగ్నిమాపక, పోలీసు బలగాలు
పాకిస్థాన్‌లోని లాహోర్ నగరం ఈ ఉదయం వరుస పేలుళ్లతో ఉలిక్కిపడింది. సైనిక విమానాశ్రయానికి సమీపంలో మూడు శక్తివంతమైన విస్ఫోటనాలు సంభవించడంతో స్థానికులలో తీవ్ర భయాందోళనలు నెలకొన్నాయి. ఈ ఘటనతో అప్రమత్తమైన అధికారులు వెంటనే ఆ ప్రాంతాన్ని తమ ఆధీనంలోకి తీసుకున్నారు.
లాహోర్‌లోని వాల్టన్ రోడ్డులో ఉన్న ఒక సైనిక విమానాశ్రయానికి వెలుపల ఈ పేలుళ్లు చోటుచేసుకున్నాయి. పెద్ద శబ్దాలతో కూడిన ఈ పేలుళ్ల అనంతరం, సమీపంలోని భవనాల నుండి దట్టమైన నల్లటి పొగలు కమ్ముకోవడంతో ప్రజలు భయంతో ఇళ్ల నుంచి బయటకు పరుగులు తీశారు. సమాచారం అందుకున్న వెంటనే అగ్నిమాపక సిబ్బంది, పోలీసులు హుటాహుటిన ఘటనా స్థలానికి చేరుకుని సహాయక చర్యలు చేపట్టారు. భద్రతా దళాలు ఆ ప్రాంతాన్ని చుట్టుముట్టి, రాకపోకలను నిలిపివేశాయి.
ఈ ఘటన జరిగిన వెంటనే ముందు జాగ్రత్త చర్యగా, ఘటన స్థలానికి సుమారు 25 కిలోమీటర్ల దూరంలో ఉన్న లాహోర్ అంతర్జాతీయ విమానాశ్రయాన్ని తాత్కాలికంగా మూసివేస్తున్నట్లు అధికారులు ప్రకటించారు. పేలుళ్లకు సంబంధించిన పలు ఫొటోలు, వీడియోలు సామాజిక మాధ్యమాల్లో విస్తృతంగా ప్రచారమవుతున్నాయి. వీటిలో పేలుళ్ల తీవ్రత, దట్టంగా అలుముకున్న పొగ స్పష్టంగా కనిపిస్తుండటంతో, ప్రజలు తమ ఆందోళనను వ్యక్తం చేస్తున్నారు. ప్రస్తుత ఉద్రిక్త పరిస్థితుల నేపథ్యంలో, అధికారులు నగరంలో భద్రతను కట్టుదిట్టం చేశారు.
