Siddu Jonnalagadda: రేపు ఓటీటీకి వస్తున్న తెలుగు సినిమాలివే!
- సిద్ధూ జొన్నలగడ్డ హీరోగా 'జాక్'
- ఈ నెల 8 నుంచి నెట్ ఫ్లిక్స్ లో
- ప్రదీప్ హీరోగా రూపొందిన లవ్ స్టోరీ
- ఈ నెల 8 నుంచి ఈటీవీ విన్ లో
రేపు ఓటీటీ ఫ్లాట్ ఫామ్ పైకి రెండు తెలుగు సినిమాలు అడుగుపెడుతున్నాయి. ఒకటి 'జాక్' అయితే, మరొకటి 'అక్కడ అమ్మాయి ఇక్కడ అబ్బాయి'. ఈ రెండు సినిమాలు కూడా క్రితం నెలలో థియేటర్లకు వచ్చినవే. 'జాక్' విషయానికి వస్తే, సిద్ధూ జొన్నలగడ్డ - వైష్ణవీ చైతన్య ప్రధానమైన పాత్రలను పోషించారు. 'బొమ్మరిల్లు' భాస్కర్ దర్శకత్వంలో బీవీఎస్ఎన్ ప్రసాద్ నిర్మించిన ఈ సినిమా, ఏప్రిల్ 10వ తేదీన థియేటర్లకు వచ్చింది.
అలాంటి ఈ సినిమా ఇప్పుడు 'నెట్ ఫ్లిక్స్' ద్వారా పలకరించడానికి రెడీ అవుతోంది. ఈ నెల 8వ తేదీ నుంచి ఈ సినిమాను స్ట్రీమింగ్ చేయనున్నారు. తెలుగుతో పాటు, తమిళ, మలయాళ, కన్నడ, హిందీ భాషలలో ఈ సినిమాను అందుబాటులోకి తీసుకురానున్నారు. అందుకు సంబంధించిన పోస్టర్ ను కూడా వదిలారు. 30 కోట్ల బడ్జెట్ తో నిర్మించిన ఈ సినిమాకి, థియేటర్స్ వైపు నుంచి ఆశించిన రెస్పాన్స్ రాలేదు. ఇక ఓటీటీ వైపు నుంచి ఎన్ని మార్కులు తెచ్చుకుంటుందనేది చూడాలి.
ఇక ప్రదీప్ హీరోగా చేసిన 'అక్కడ అమ్మాయి ఇక్కడ అబ్బాయి' సినిమా, ఈ నెల 8వ తేదీ నుంచి 'ఈటీవీ విన్' లో స్ట్రీమింగ్ కానుంది. అందుకు సంబంధించిన అధికారిక పోస్టర్ ను వదిలారు. భరత్ - నితిన్ దర్శకత్వం వహించిన ఈ సినిమాతో, కథానాయికగా 'దీపిక' పరిచయమైంది. ఏప్రిల్ 11వ తేదీన థియేటర్స్ కి వచ్చిన ఈ సినిమా, ఆశించిన ఫలితాన్ని అందుకోలేకపోయింది. ఓటీటీ వైపు నుంచి ఈ సినిమా ఎంతవరకూ కనెక్ట్ అవుతుందో చూడాలి. 