మా బాధ ఎవరికీ అర్థం కాదు: రకుల్ ప్రీత్ సింగ్ భర్త

బాలీవుడ్ అగ్ర నటులు అక్షయ్‌కుమార్‌, టైగర్‌ ష్రాఫ్‌ కలిసి నటించిన భారీ బడ్జెట్ చిత్రం ‘బడే మియా ఛోటే మియా’. గత ఏడాది వేసవిలో విడుదలైన ఈ సినిమా బాక్సాఫీస్ వద్ద తీవ్రంగా నిరాశపరిచింది. ఈ చిత్రం వల్ల తాము ఆర్థికంగా ఎన్నో ఇబ్బందులు ఎదుర్కొన్నామని, సినిమా కోసం ఆస్తులు సైతం తాకట్టు పెట్టాల్సి వచ్చిందని నిర్మాత జాకీ భగ్నానీ తాజాగా వెల్లడించారు. నటి రకుల్ ప్రీత్ సింగ్ భర్త అయిన జాకీ, ఈ సినిమా వైఫల్యంపై తొలిసారిగా స్పందించారు.

ఈ సినిమా ఫలితం తన జీవితంలో ఒక ముఖ్యమైన గుణపాఠం నేర్పిందని జాకీ భగ్నానీ అన్నారు. "ఒక ప్రాజెక్ట్‌ను భారీ స్థాయిలో నిర్మించడమే విజయానికి సరిపోదని ఈ సినిమా విడుదల తర్వాత అర్థమైంది. మా కంటెంట్‌తో ప్రేక్షకులు ఎందుకు కనెక్ట్ కాలేకపోయారో మేము విశ్లేషించుకోవాలి. ప్రేక్షకుల నిర్ణయం ఎప్పుడూ సరైనదే. వారి తీర్పును తప్పుపట్టకుండా, దీనిని ఒక పాఠంగా స్వీకరించి భవిష్యత్తులో ఇలాంటి పొరపాట్లు జరగకుండా జాగ్రత్త పడతాను" అని ఆయన వివరించారు.

సినిమా వసూళ్ల గురించి మాట్లాడుతూ, "బాక్సాఫీస్ వద్ద మా చిత్రం పెట్టిన పెట్టుబడిలో 50 శాతం కంటే తక్కువే రాబట్టింది. ఈ క్రమంలో మేము పడిన బాధ ఎవరికీ అర్థం కాదు. ఈ చిత్రాన్ని నిర్మించడానికి మా ఆస్తులను కూడా తాకట్టు పెట్టాం. అయితే, ఇప్పుడు ఈ విషయాలు చెప్పడం వల్ల ఎలాంటి ప్రయోజనం లేదు" అని జాకీ భగ్నానీ ఆవేదన వ్యక్తం చేశారు. లాభాలు ఆర్జించాలనే ఉద్దేశంతోనే సినిమా తీశామని, కానీ ఆ లక్ష్యాన్ని చేరుకోలేకపోయామని ఆయన అంగీకరించారు.

అలీ అబ్బాస్ జాఫర్ దర్శకత్వంలో సైన్స్ ఫిక్షన్ యాక్షన్ ఎంటర్‌టైనర్‌గా ‘బడే మియా ఛోటే మియా’ తెరకెక్కింది. ఈ చిత్రంలో పృథ్వీరాజ్ సుకుమారన్, మానుషి చిల్లర్, అలయ ఎఫ్, సోనాక్షి సిన్హా వంటి తారలు కీలక పాత్రలు పోషించారు. సినీ విశ్లేషకుల అంచనాల ప్రకారం, సుమారు రూ. 350 కోట్ల భారీ బడ్జెట్‌తో నిర్మించిన ఈ చిత్రం ప్రపంచవ్యాప్తంగా కేవలం రూ. 102 కోట్లు మాత్రమే వసూలు చేయగలిగింది. నిర్మాత జాకీ భగ్నానీ, నటి రకుల్ ప్రీత్ సింగ్‌ను వివాహం చేసుకోవడంతో ఆయన తెలుగు ప్రేక్షకులకు కూడా సుపరిచితులయ్యారు.