పాక్ హైకమిషన్ వద్ద కేక్ కలకలం.. వైరల్ గా మారిన వీడియో ఇదిగో!

పహల్గామ్ లో పర్యాటకులపై జరిగిన ఉగ్రదాడి దేశవ్యాప్తంగా తీవ్ర ఆగ్రహానికి కారణమైంది. ఈ దాడిలో మొత్తం 26 మంది మరణించగా, మరో 20 మంది గాయపడ్డారు. ఈ దారుణ ఘటన అనంతరం ఢిల్లీలోని పాకిస్థాన్ హైకమిషన్ వద్ద ఉద్రిక్త పరిస్థితులు నెలకొన్నాయి. దాదాపు 500 మందికి పైగా నిరసనకారులు పాక్ హైకమిషన్ సమీపంలో ఆందోళన చేపట్టారు. ఉగ్రవాదానికి పాకిస్థాన్ మద్దతు ఇస్తోందని ఆరోపిస్తూ, ఆ దేశానికి వ్యతిరేకంగా నినాదాలు చేశారు.

ఇదే సమయంలో, పాకిస్థాన్ హైకమిషన్‌కు ఒక వ్యక్తి కేక్ బాక్స్‌తో వెళుతున్న వీడియో సోషల్ మీడియాలో వైరల్ అయింది. దాడి జరిగిన రెండు రోజులకే ఈ సంఘటన జరగడంతో వివాదం చెలరేగింది. విలేకరులు ప్రశ్నించినప్పటికీ, ఆ వ్యక్తి కేక్ ఎందుకు తీసుకెళ్తున్నాడో వెల్లడించలేదు. ఓవైపు పహల్గామ్ లో ఉగ్రవాదులు 26 మంది అమాయక పర్యాటకులను పొట్టనపెట్టుకుంటే పాక్ హైకమిషన్ లో కేకుతో వేడుకలు జరుపుకుంటున్నారని విమర్శలు వ్యక్తమవుతున్నాయి.