గురుమూర్తి గోశాలకు వెళ్లగలిగినప్పుడు, భూమనను ఏ శక్తి ఆపింది?: దీపక్ రెడ్డి

టీటీడీ గోశాల వివాదంపై టీటీడీ మాజీ చైర్మన్, వైసీపీ నేత భూమన కరుణాకర్ రెడ్డి చేస్తున్న ఆరోపణలు పూర్తిగా అవాస్తవమని, వాటిని తీవ్రంగా ఖండిస్తున్నామని తెలుగుదేశం పార్టీ (టీడీపీ) అధికార ప్రతినిధి గుణపాటి దీపక్ రెడ్డి అన్నారు. భూమన వ్యాఖ్యలను ముఖ్యమంత్రి చంద్రబాబు ఇప్పటికే తిప్పికొట్టారని ఆయన గుర్తుచేశారు.

ఇవాళ దీపక్ రెడ్డి వీడియోలో మాట్లాడుతూ, "భూమన కరుణాకర్ రెడ్డి గోశాల విషయంలో అసత్య ప్రచారం చేస్తున్నారు. మంత్రి నారా లోకేశ్ కూడా తక్షణమే స్పందించి, ఆధారాలు చూపాలని సవాల్ విసిరి వారి అబద్ధాలను బయటపెట్టారు. నిజానిజాలు నిగ్గు తేల్చేందుకు మా ఎమ్మెల్యేలు స్వయంగా గోశాలను సందర్శించి, వైసీపీ ఆరోపణలు నిరాధారమైనవని స్పష్టం చేశారు" అని తెలిపారు.

ఒకవైపు తనను గృహ నిర్బంధం చేశారని భూమన చెప్పడం, మరోవైపు అదే సమయంలో ఎంపీ గురుమూర్తిని గోశాల సందర్శనకు అనుమతించడం వెనుక ఆంతర్యం ఏమిటని దీపక్ రెడ్డి ప్రశ్నించారు. "ఎంపీ గురుమూర్తి గోశాలకు వెళ్లగలిగినప్పుడు, భూమన కరుణాకర్ రెడ్డిని ఏ శక్తి ఆపింది? ఆయన చెప్పేదానికి, జరిగేదానికి పొంతన లేదు. ఇది ఆయన వాదనల్లోని డొల్లతనాన్ని బయటపెడుతోంది," అని వ్యాఖ్యానించారు.

గతంలో వారి హయాంలో అనేక అవకతవకలు జరిగాయని, రికార్డులను పరిశీలిస్తే ఈ విషయం స్పష్టమవుతుందని, ఇప్పటికే పలు విజిలెన్స్ విచారణలు కూడా జరిగాయని దీపక్ రెడ్డి తెలిపారు. గతంలో జరిగిన అన్ని తప్పులపై ప్రస్తుత ప్రభుత్వం కఠిన చర్యలు తీసుకుంటుందని దీపక్ రెడ్డి స్పష్టం చేశారు.

"హిందూ ధర్మాన్ని, హిందువుల మనోభావాలను కాపాడటానికి మేము కట్టుబడి ఉన్నాం. ఇలాంటి అసత్య ప్రచారాలను, బాధ్యతారహితమైన వ్యాఖ్యలను ఎట్టిపరిస్థితుల్లోనూ సహించబోం. ఎప్పటికైనా సత్యమే గెలుస్తుంది" అని దీపక్ రెడ్డి స్పష్టం చేశారు.