రోహిత్ శ‌ర్మ‌ను భ‌య‌పెట్టిన అభిమాని.. ఇదిగో వీడియో!

గ‌త‌ నెల 25వ తేదీన బెంగళూరులోని చిన్నస్వామి స్టేడియం వేదిక‌గా ఆర్‌సీబీ, పంజాబ్ కింగ్స్ (పీబీకేఎస్‌) మ‌ధ్య జ‌రిగిన మ్యాచ్‌లో ఓ అభిమాని సెక్యూరిటీ సిబ్బంది క‌ళ్లుగ‌ప్పి మైదానంలోకి ప్ర‌వేశించిన విష‌యం తెలిసిందే. విరాట్ కోహ్లీ వ‌ద్దకు ప‌రిగెత్తుకువ‌చ్చిన ఆ అభిమాని.. కోహ్లీ కాళ్లు మొక్కడంతో పాటు కౌగిలించుకున్నాడు. ఆ త‌ర్వాత సెక్యూరిటీ సిబ్బంది అత‌డిని మైదానం నుంచి బ‌య‌ట‌కు తీసుకెళ్లారు. అచ్చం ఇలాంటి సంఘ‌ట‌న‌ సోమ‌వారం నాటి ముంబై ఇండియ‌న్స్‌, రాజ‌స్థాన్ రాయ‌ల్స్ (ఆర్ఆర్‌) మ్యాచ్‌లోనూ చోటు చేసుకుంది. మ్యాచ్ రెండో ఇన్నింగ్స్‌లో ముంబై ఫీల్డింగ్ చేస్తున్న స‌మ‌యంలో ఈ ఘ‌ట‌న జ‌రిగింది. 

ఓ అభిమాని సెక్యూరిటీ సిబ్బంది క‌ళ్లుగ‌ప్పి మైదానంలోకి ప్ర‌వేశించాడు. అనంత‌రం నేరుగా రోహిత్ శ‌ర్మ వ‌ద్ద‌కు ప‌రిగెత్తుకువ‌చ్చాడు. ఊహించ‌ని ఈ ప‌రిణామంతో ఒక్క‌సారిగా ఉలిక్కిప‌డ్డ హిట్‌మ్యాన్.. ఆ అభిమానిని కౌగిలించుకుని మైదానం నుంచి బ‌య‌టికి వెళ్లాల‌ని కోరాడు. ఇక రోహిత్‌ను కౌగిలించుకున్న ఆ వ్య‌క్తి త‌ర్వాత ప‌క్క‌నే కీపింగ్ చేస్తున్న ఇషాన్ కిష‌న్‌తో క‌రచాల‌నం చేసి గ్రౌండ్ నుంచి బ‌య‌ట‌కు ప‌రుగులు తీశాడు. ఇది గ‌మ‌నించిన సెక్యూరిటీ సిబ్బంది వెంట‌నే అత‌డిని అదుపులోకి తీసుకుని మైదానం నుంచి బ‌య‌ట‌కు లాక్కెళ్లారు. ఈ ఘ‌ట‌న తాలూకు వీడియో ప్ర‌స్తుతం సోష‌ల్ మీడియాలో వైర‌ల్ అవుతోంది.