ప్రభాస్ కు ఫుడ్ రెసిపీ చాలెంజ్ విసిరిన అనుష్క

అనుష్క, నవీన్ పోలిశెట్టి నటించిన మిస్ శెట్టి మిస్టర్ పోలిశెట్టి చిత్రం విడుదలకు సిద్ధంగా ఉంది. సెప్టెంబరు 7న ఈ ఎంటర్టయిన్ మూవీ ప్రేక్షకుల ముందుకు రానుంది. ఈ సినిమా ప్రమోషన్స్ లో భాగంగా చిత్రబృందం వినూత్న రీతిలో రెసిపీ చాలెంజ్ ప్రారంభించింది. 

ఈ చిత్రంలో అనుష్క ఓ చెఫ్ పాత్ర పోషించిన నేపథ్యంలో, సోషల్ మీడియాలో ఫుడ్ రెసిపీ చాలెంజ్ ను విస్తృతం చేయాలని భావిస్తున్నారు. ఇందులో భాగంగా అనుష్క మంగళూరు చికెన్ కర్రీ, మంగళూరు నీర్ దోసె రెసిపీలను పంచుకున్నారు. అనంతరం ఈ చాలెంజ్ ను స్వీకరించాలంటూ హీరో ప్రభాస్ ను నామినేట్ చేశారు.

"మిస్ శెట్టి మిస్టర్ పోలిశెట్టి చిత్రంలో నేనొక చెఫ్ పాత్ర పోషిస్తున్నాను. నా పాత్ర ఎంతో సరదాగా ఉంటుంది. ఈ క్రమంలో నేను మిస్ శెట్టి మిస్టర్ పోలిశెట్టి రెసిపీ చాలెంజ్ ను ప్రారంభిస్తున్నాను. నా ఫేవరెట్ రెసిపీని మీతో పంచుకుంటున్నాను. ఇక, ఈ చాలెంజ్ ను స్వీకరించాల్సిందిగా ప్రభాస్ ను కోరుతున్నాను. 

ఎందుకంటే, ప్రభాస్ భోజన ప్రియుడని అందరికీ తెలిసిందే. పైగా, ఇతరులకు పసందైన వంటకాలను తినిపించడం కూడా ఆయనకు బాగా ఇష్టం. అందుకే ఈ రెసిపీ చాలెంజ్ కు ప్రభాస్ పేరును ట్యాగ్ చేస్తున్నాను. ప్రభాస్ తన ఫేవరెట్ రెసిపీని అందరితో పంచుకోవాలని కోరుతున్నాను. అందరూ ఈ చాలెంజ్ లో పాలుపంచుకోవచ్చు. మీ ఫేవరెట్ రెసిపీ ఏంటో నాతో పంచుకోండి... మిస్ శెట్టి మిస్టర్ పోలిశెట్టి చాలెంజ్ ను మరింత ముందుకు తీసుకెళ్లండి" అంటూ అనుష్క పిలుపునిచ్చారు.