ఆ వీడియో నీదే.. నీకు తెలుసా..? అవునేమో..! పాట్నా రైల్వే స్టేషన్ ఘటనపై పోర్న్ స్టార్ స్పందన!

బీహార్‌లోని పాట్నా రైల్వే స్టేషన్‌లో ఆదివారం ఉదయం ‘పోర్న్‌’ వీడియో కలకలం రేపిన విషయం తెలిసిందే. స్టేషన్‌లో అమర్చిన పలు టీవీ స్క్రీన్లపై ప్రత్యక్షమైన పోర్న్‌ దృశ్యాలు.. ఏకంగా మూడు నిమిషాల పాటు కొనసాగాయి. దీంతో స్టేషన్‌లోని వందల మంది ప్రయాణికులు ఇబ్బంది పడ్డారు.  

ఈ విషయంపై తాజాగా ఓ పోర్న్ నటి స్పందించింది. అమెరికాకు చెందిన కెండ్రా లస్ట్.. ట్విట్టర్ లో ‘ఇండియా’ అని రాసి ‘బీహార్ రైల్వే స్టేషన్’ హ్యాష్ ట్యాగ్ ను జత చేసింది. దీంతో ఒక్కసారిగా ఈ ట్వీట్ వైరల్ అయింది. స్టేషన్ లో పోర్న్ వీడియో ప్లే కావడాన్ని పరోక్షంగా ప్రస్తావించడంపై నెటిజన్లు కామెంట్ల వర్షం కురిపిస్తున్నారు. ‘అది నీ వీడియోనే.. నీకు తెలుసా?’ అంటూ అర్మాన్ అనే ఓ యూజర్ కామెంట్ చేయగా.. ‘అవుననే అనుకుంటున్నా’అని కెండ్రా లస్ట్ బదులిచ్చింది. 

పాట్నా స్టేషన్ లో పోర్న్ క్లిప్ కావడం దేశవ్యాప్తంగా వైరల్ అయింది. రంగంలోకి దిగిన ఆర్‌పీఎఫ్ పోలీసులు.. రైల్వే స్టేషన్‌లో టీవీలు అమర్చిన కాంట్రాక్ట్ సంస్థ దత్తా కమ్యూనికేషన్స్‌కు సమాచారం అందించారు. తక్షణం పోర్న్‌ వీడియో ప్రసారం నిలిపివేయించారు.

రైల్వే అధికారులు ఆ సంస్థపై ఫిర్యాదు చేయడంతో కేసు కూడా నమోదైంది. దత్తా కమ్యూనికేషన్స్‌ను రైల్వే శాఖ బ్లాక్ లిస్టులో పెట్టడంతో పాటూ జరిమానా కూడా విధించింది. ఆ సంస్థతో కాంట్రాక్ట్‌ను రైల్వే శాఖ రద్దు చేసుకున్నట్టు సమాచారం. మరోవైపు స్టేషన్‌లోని 10వ నెంబర్ ప్లాట్‌ఫాంలోని టీవీల్లోనే ఈ వీడియో కనిపించడంపైనా అధికారులు దృష్టి సారించారు.