ఢిల్లీలోని ఇందిరాగాంధీ అంతర్జాతీయ విమానాశ్రయంలో కోతి హల్‌చల్

ఎప్పుడూ బిజీగా ఉండే ఇందిరా గాంధీ అంతర్జాతీయ విమానాశ్రయంలో సడెన్‌గా ఒక కోతి ప్రత్యక్షమైంది. ఇక్కడి బార్‌లో జూస్ తాగి, ఆహారం ఎత్తుకెళ్లింది. ఈ కోతి హల్‌చల్‌ చేయడాన్ని చుట్టూ ఉన్న ప్రయాణికులు ఆసక్తిగా గమనించారు. కొందరు దీన్ని వీడియో తీసి సోషల్ మీడియాలో పోస్ట్ చేయడంతో వీడియో వైరల్ అయింది. ఈ విషయంపై ఎయిర్‌పోర్టు అధికారులను సంప్రదించగా కోతి రావడం నిజమేనని వారు చెప్పారు. అయితే ఈ ఘటనలో ఎవరికీ ఎటువంటి హానీ జరగలేదని స్పష్టం చేశారు.

అయితే ఈ ఘటన ఎప్పుడు జరిగిందీ అధికారులు తెలుపలేదు. ఘటన జరిగిన సమయంలో విమానాశ్రయంలో ఉన్న ఒక ప్రయాణికుడు మాత్రం ఈ కోతి ఘటన శుక్రవారం జరిగినట్లు చెప్పారు. దీనిపై అధికారిక ప్రకటన రాలేదు. కొన్ని రోజుల క్రితం భారీ వర్షాలకు ఐజీఐ విమానాశ్రయం ఎంట్రన్స్ పూర్తిగా నీటమునిగిన సంగతి తెలిసిందే. ఇప్పుడు మరోసారి కోతి కారణంగా విమానాశ్రయం వార్తల్లో నిలిచింది.