సీఎం జగన్ ను ఎద్దేవా చేస్తూ హరీశ్ రావు వీడియో పోస్టు చేసిన నారా లోకేశ్

ఏపీలో జగన్ సర్కారు తీసుకుంటున్న నిర్ణయాలపై వ్యంగ్యం ప్రదర్శిస్తూ టీడీపీ ఎమ్మెల్సీ నారా లోకేశ్ తాజాగా ఓ ట్వీట్ చేశారు. వైఎస్ జగన్ గారి అద్భుత పాలనా పాటవాల గురించి పక్క రాష్ట్రాల మంత్రులు ఎంత గొప్పగా చెప్పుకుంటున్నారో చూడండి అంటూ ఓ వీడియో పోస్టు చేశారు. అందులో తెలంగాణ మంత్రి హరీశ్ రావు ఓ కార్యక్రమంలో మాట్లాడుతూ, ఏపీలో పరిస్థితులు బాగా కలిసొచ్చాయి అంటూ వ్యాఖ్యానించడం చూడొచ్చు. ఏపీ రాజధాని అమరావతిలో అనిశ్చితి కారణంగా హైదరాబాదులో రియల్ ఎస్టేట్ వ్యాపారం బాగా పుంజుకుందన్న కోణంలో ఆయన వ్యాఖ్యానించారు. ఈ అవకాశాన్ని సద్వినియోగం చేసుకోవాలని కోరారు. సరిగ్గా, ఈ కామెంట్ తోనే సీఎం జగన్ ను లోకేశ్ ఎద్దేవా చేస్తూ తాజా ట్వీట్ చేసినట్టు అర్థమవుతోంది.