ఔట్ గోయింగ్ కాల్స్ పై పరిమితి తొలగించిన ఎయిర్ టెల్!

అన్ లిమిటెడ్ ప్లాన్లు తీసుకున్నా, ఇతర నెట్ వర్క్ లకు చేసే కాల్స్ పై పరిమితులు ఉన్న ఈ రోజుల్లో, దాన్ని ఎత్తివేస్తూ, భారతీ ఎయిర్ టెల్ నిర్ణయం తీసుకుంది. ఈ నెల 3వ తేదీ నుంచి కొత్తగా ప్రవేశపెట్టిన అన్ని ప్లాన్లకూ ఇది వర్తిస్తుందని ఓ ప్రకటనలో పేర్కొంది. ఇటీవల ప్రీపెయిడ్ ప్లాన్ల ధరలను 43 నుంచి 50 శాతం వరకూ పెంచిన ఎయిర్ టెల్, ఏడాది వ్యాలిడిటీ ప్లాన్ పై 12 వేల నిమిషాల ఇతర నెట్ వర్క్ ల ఔట్ గోయింగ్ కాల్స్ పరిమితిని విధించిన సంగతి తెలిసిందే. ఆపై చేసే కాల్స్ కు నిమిషానికి 6 పైసలు వసూలవుతాయని కూడా ప్రకటించింది.

దీనిపై విమర్శలు వెల్లువెత్తగా, దిగొచ్చిన సంస్థ ఎయిర్ టెల్ నుంచి, ఏ ఇతర నెట్ వర్క్ కు అయినా, గతంలో మాదిరిగానే అపరిమితంగా మాట్లాడుకోవచ్చని, ఎటువంటి అదనపు రుసుములు ఉండవని స్పష్టం చేసింది. కాగా, మిగతా ప్రధాన టెల్కోలయిన వోడాఫోన్ ఐడియా, జియో సంస్థలు కూడా ఇదే దారిలో నడుస్తాయో? లేదో? వేచి చూడాలి.