పాక్ వదిలిన మోర్టార్ ను నిర్వీర్యం చేస్తూ... త్రుటిలో తప్పించుకున్న భారత సైనికులు.. వీడియో ఇదిగో!

పూంఛ్ సెక్టర్ లో కాల్పుల విరమణ ఒప్పందానికి తూట్లు పొడుస్తూ, పాకిస్థాన్ ప్రయోగించిన ఓ 120 ఎంఎం మోర్టార్ షెల్ ను నిర్వీర్యం చేస్తూ, త్రుటిలో తప్పించుకున్న భారత సైనికుల వీడియో ఇప్పుడు వైరల్ అవుతోంది. వాస్తవాధీన రేఖకు సమీపంలోని ఓ గ్రామంపై జరిపిన దాడిలో ఈ మోర్టార్ పేలకుండా ఉండిపోగా, దాన్ని జవాన్లు పేల్చారు. బాలాకోట్ లోని మెధార్ ప్రాంతంలో ఈ మోర్టార్ పడిపోయింది.

శనివారం నాడు కొంతమంది గ్రామస్థులు దీన్ని చూసి, సైన్యానికి సమాచారాన్ని అందించారు. ఆపై రంగంలోకి దిగిన ఆర్మీ నిపుణులు, దాన్ని నాశనం చేశారు. ఇక ఈ వీడియోలో మోర్టార్ చుట్టూ ఇసుక బస్తాలను పేర్చిన ఇద్దరు సైనికులు, దాన్ని వెలిగించి, అక్కడి నుంచి పక్కకు తప్పుకుంటున్న దృశ్యాలు కనిపిస్తున్నాయి. ఆ వెంటనే అది భారీ శబ్దం చేస్తూ పేలింది. బాలాకోట్ తో పాటు పలు ప్రాంతాల్లో పాక్ సైనికులు నిత్యమూ కాల్పులు జరుపుతున్న సంగతి తెలిసిందే. వాటిని భారత జవాన్లు సమర్థవంతంగా తిప్పికొడుతున్నారు.