టేకాఫ్ కు సిద్ధమవుతున్న విమానం నుంచి రూ.7.8 కోట్ల దోపిడీ

అల్బేనియాలో కొందరు సాయుధ దుండగులు గాల్లోకి ఎగరడానికి సిద్ధంగా ఉన్న విమానం నుంచి రూ.7.8 కోట్ల దోపిడీకి పాల్పడ్డారు. అల్బేనియా రాజధాని టిరానాకు సమీపంలోని మదర్ థెరెస్సా రినాసీ ఇంటర్నేషనల్ ఎయిర్ పోర్టులో ఈ ఘటన జరిగింది. ఆస్ట్రియన్ ఎయిర్ లైన్స్ కు చెందిన విమానం అన్ని క్లియరెన్సులు పూర్తిచేసుకుని టేకాఫ్ కు సిద్ధమైన తరుణంలో కొందరు సాయుధులు ఏకే-47 తుపాకులతో విమానంలోకి ప్రవేశించి నగదు దోపిడీ చేశారు. అనంతరం పారిపోతుండగా, విమానాశ్రయానికి కిలోమీటరు దూరంలో ఓ దోపిడీదారుడ్ని పోలీసులు కాల్చి చంపారు. మిగతావారు నగదుతో పరారయ్యారు.

విమానంలో దోపిడీ జరిగిందన్న సమాచారంతో దాదాపు 500 మంది పోలీసులు రంగంలోకి దిగారు. వారికి ఓ హెలికాప్టర్ కూడా సాయం అందించింది. దుండగులు ట్యాక్స్ డిపార్ట్ మెంట్ స్టిక్కర్ లో ఉన్న కారును ఈ దోపిడీ కోసం ఉపయోగించారు. దొంగిలించిన సొమ్ము ట్రావెల్ ఇన్సూరెన్స్ కంపెనీలకు చెందినదిగా భావిస్తున్నారు. అయితే, తాము ప్రయాణించిన కారును ఓ ప్రాంతంలో తగులబెట్టిన దుండగులు మరో వాహనంలో ఉడాయించారు.