మాజీ ప్రధాని ఇందిరాగాంధీపై కేంద్ర మంత్రి గడ్కరీ ప్రశంసలు

మహిళా రిజర్వేషన్ల బిల్లుపై ప్రసంగిస్తున్న సందర్భంలో మాజీ ప్రధాని ఇందిరా గాంధీని కేంద్ర మంత్రి, బీజేపీ అగ్ర నేత నితిన్ గడ్కరీ గుర్తుచేసుకున్నారు. నాగపూర్ లో జరిగిన ఓ కార్యక్రమంలో మహిళలకు రిజర్వేషన్ల అంశంపై ఆయన మాట్లాడారు. మహిళా రిజర్వేషన్ల హోదా పొందకుండానే మగవారి మధ్య మేటి నేతగా నాడు ఇందిరాగాంధీ  తన సత్తా చాటుకున్నారని ప్రశంసలు కురిపించారు. ఎటువంటి రిజర్వేషన్ సౌకర్యం పొందకుండానే ఆమె తన పాలన సాగించిన విషయాన్ని ప్రస్తావించారు.

ఈ సందర్భంగా తమ పార్టీకి చెందిన మహిళా నేతలు సుష్మా స్వరాజ్, వసుంధర రాజే, లోక్ సభ స్పీకర్ సుమిత్రా మహాజన్ కూడా ఎటువంటి రిజర్వేషన్ సౌకర్యం లేకుండానే రాజకీయాల్లో దూసుకెళ్తున్నారని కొనియాడారు. ఎవరైనా తమ ప్రతిభ ఆధారంగానే రాణించాలి తప్ప, కులమతాలు, ప్రాంతం, భాష వంటి అంశాలను ఆధారం చేసుకుని కాదన్న గడ్కరీ, మహిళా రిజర్వేషన్ కు తాను వ్యతిరేకం కాదని స్పష్టం చేశారు. కులమతాల ఆధారంగా చేసే రాజకీయాలను తాము వ్యతిరేకిస్తామని తెలిపారు.