నాకు ఏ మాత్రం డౌట్ లేదు: కేసీఆర్

ఈ ఉదయం సిద్ధిపేట నియోజకవర్గ పరిధిలోని చింతమడక గ్రామానికి తన భార్యతో కలసి వచ్చిన తెలంగాణ ఆపద్ధర్మ సీఎం కె.చంద్రశేఖరరావు, ఓటు హక్కును వినియోగించుకున్నారు. కేసీఆర్ రాక సందర్భంగా భారీ భద్రతా ఏర్పాట్లు చేయగా, ఇతర ఓటర్లకు ఇబ్బంది కలగరాదన్న ఉద్దేశంతో కేవలం 5 నిమిషాల్లో కేసీఆర్, తన ఓటును వేసేసి వెళ్లిపోయారు. అంతకుముందు మీడియాతో మాట్లాడుతూ, ఈ ఎన్నికల్లో విజయం సాధించబోయేది టీఆర్ఎస్సేనని అన్నారు. భారీ మెజారిటీతో తాము గెలవబోతున్నామని, ఈ విషయం సాయంత్రానికి ఎగ్జిట్ పోల్స్ రూపంలో వెల్లడవుతుందని తెలిపారు.

టీఆర్ఎస్ వైపు అనుకూల పవనాలు వీస్తున్నాయని అన్నారు. ప్రభుత్వానికి అనుకూలంగా ఓటర్లు ఉన్నారని, ఈ దఫా ఓట్ల శాతం చాలా పెరగబోతున్నదని కేసీఆర్ అంచనా వేశారు. తిరిగి అధికారంలోకి వచ్చేది టీఆర్ఎస్ అని, ఈ విషయంలో తనకు ఎటువంటి అనుమానాలు లేవని అన్నారు. తాను కేవలం ఓటు వేసేందుకు మాత్రమే వచ్చానని, గ్రామస్థులను కలవలేదని, మరో రెండు వారాల్లో వచ్చి కలుస్తానని మాత్రం చెప్పానని అన్నారు. ఓటేసేందుకు వచ్చిన కేసీఆర్ కు హరీశ్ రావు స్వాగతం పలికారు.