ప్రేమించి పెళ్లాడాడు.. నమ్మి వెంట వస్తే వ్యభిచార కూపంలోకి దింపాడు!

ప్రేమించి పెళ్లి చేసుకున్న ఓ ప్రబుద్ధుడు నమ్మి వెంట వచ్చిన యువతిని వ్యభిచారంలోకి దింపిన ఘటన విజయనగరం జిల్లాలో వెలుగు చూసింది. విటుల వేషంలో వెళ్లిన పోలీసులు నిందితుడిని చాకచక్యంగా అదుపులోకి తీసుకున్నారు. పోలీసుల కథనం ప్రకారం.. నగరంలోని ఉడా కాలనీలో ఆటో డ్రైవర్ బి.చక్రధర్ వ్యభిచార దందా నిర్వహిస్తున్నాడు. ఈ క్రమంలో అతడికి ఢిల్లీకి చెందిన యువతితో పరిచయం ఏర్పడింది. ప్రేమ పేరుతో నాటకం ఆడిన చక్రధర్ ఆమెను తన వలలో పడేసుకున్నాడు.

ఓరోజు ఆమెను విజయనగరం తీసుకొచ్చి మరో ఇద్దరు మహిళలు ఉన్న ఇంట్లో పెట్టాడు. ఆ ఇద్దరు తన బంధువులని ఆమెను నమ్మించాడు. కొన్నాళ్లకు మరో అమ్మాయిని తీసుకొచ్చాడు. ఈ నేపథ్యంలో ఢిల్లీ యువతిని శారీరకంగా లొంగదీసుకున్న నిందితుడు, పెళ్లి చేసుకుంటానని, కాకపోతే తాను చెప్పినట్టు చేసి డబ్బులు సంపాదించాలని వేధించడం మొదలుపెట్టాడు.

చక్రధర్ బారి నుంచి తప్పించుకునే మార్గం లేక అతడు పెట్టే బాధలు భరించిన యువతి ఈ నెల 3న ఎలాగోలా తప్పించుకుని పోలీస్ స్టేషన్‌కు బయలుదేరింది. అయితే, మార్గమధ్యంలో స్పృహ తప్పి పడిపోవడంతో పోలీసులు ఆమెను ఆసుపత్రికి తరలించారు. అనంతరం జరిగిన విషయాన్ని పోలీసులకు ఫిర్యాదు చేసింది. కేసు నమోదు చేసుకున్న పోలీసులు మారువేషంలో విటుల్లా వెళ్లి నిందితుడు చక్రధర్‌ను అదుపులోకి తీసుకున్నారు. పలు సెక్షన్ల కింద కేసు నమోదు చేసి దర్యాప్తు చేస్తున్నారు.