చాలా రోజుల తరువాత అందమైన అమ్మాయితో రొమాన్స్: 'దేవదాస్' సినిమా గురించి నాగార్జున

చాలా రోజుల తరువాత ఓ అందమైన అమ్మాయితో రొమాన్స్ చేసే అవకాశం తనకు దక్కిందని హీరో నాగార్జున చమత్కరించారు. ప్రస్తుతం నాగ్, నాని కాంబినేషన్ లో 'దేవదాస్' చిత్రం తెరకెక్కుతున్న సంగతి తెలిసిందే. ఈ సినిమాలో నాగ్ 'దేవ్' పాత్రలో నటిస్తుండగా, ఆయన సరసన తొలిసారిగా ఆకాంక్ష సింగ్ హీరోయిన్ గా నటిస్తోంది.

సినిమాలో ఆకాంక్ష 'జాహ్నవి' పాత్రలో నటిస్తుండగా, ఆమెను పరిచయం చేస్తూ, తన ట్విట్టర్ ఖాతాలో ఓ పోస్టర్ ను విడుదల చేసిన నాగ్, "చాలా రోజులు తరవాత నా పక్కన ఒక అందమైన అమ్మాయి!! యా... రొమాన్స్ ఎగైన్" అని వ్యాఖ్యానించారు. ఈ సినిమా పాట లిరికల్ వీడియోను నేటి సాయంత్రం విడుదల చేయనున్నట్టు తెలిపారు. ఇక తెరపై హీరోయిన్లతో రొమాన్స్ ను పండించే నాగ్, ఆకాంక్షతో చేసే రొమాంటిక్ సన్నివేశాల గురించి తెలియాలంటే, ఈ నెల 27 వరకూ వేచి చూడక తప్పదు.