సినిమా కబుర్లు.. సంక్షిప్త సమాచారం

 *  తెలుగులో తాజాగా 'సాక్ష్యం' చిత్రాన్ని పూర్తి చేసి, మరోపక్క మహేశ్ బాబుతో ఓ చిత్రాన్ని చేస్తున్న అందాలతార పూజా హెగ్డే త్వరలో హిందీ చిత్రం షూటింగులో పాల్గొంటుంది. అక్షయ్ కుమార్ హీరోగా సాజిద్ ఖాన్ దర్శకత్వంలో రూపొందుతున్న 'హౌస్ ఫుల్ 4' చిత్రంలో పూజ హీరోయిన్ గా నటిస్తోంది. ఈ చిత్రం షూటింగ్ కోసం త్వరలో లండన్ వెళ్లనుంది.
*  హిందీలో విజయం సాధించిన 'క్వీన్' చిత్రాన్ని దక్షిణాది భాషల్లో రీమేక్ చేస్తున్న విషయం తెలిసిందే. ప్రస్తుతం ఈ చిత్రం షూటింగ్ పారిస్ లో జరుగుతోంది. ముఖ్యమైన సన్నివేశాల చిత్రీకరణ అక్కడ నిర్వహిస్తున్నారు. ఈ చిత్రం తెలుగు వెర్షన్ 'దటీజ్ మహాలక్ష్మి' కోసం తమన్నా, తమిళ వెర్షన్ షూటింగ్ కోసం కాజల్  ప్రస్తుతం పారిస్ లో ఉన్నారు.
*  యువ నటుడు రాహుల్ రవీంద్రన్ దర్శకుడిగా మారి, సుశాంత్ హీరోగా 'చి.ల.సౌ' పేరిట ఓ చిత్రాన్ని రూపొందిస్తున్నాడు. ఇది సెట్స్ పై ఉండగానే, తన తదుపరి చిత్రాన్ని కూడా రాహుల్ ప్రకటించాడు. అన్నపూర్ణా స్టూడియోస్ నిర్మించే తదుపరి చిత్రానికి కూడా తాను దర్శకత్వం వహించనున్నట్టు పేర్కొన్నాడు. ఇందులో నాగచైతన్య హీరోగా నటిస్తాడని సమాచారం.