శామ్ సంగ్ నుంచి ఈ నెల్లోనే బడ్జెట్ ధరలో బెజెల్ లెస్ ఫోన్లు

శామ్ సంగ్ బడ్జెట్ ధరలో బెజెల్ లెస్ డిస్ ప్లేతో కూడిన మొబైల్స్ ను ఈ నెలలోనే భారత మార్కెట్లోకి తీసుకురానుంది. గెలాక్సీ ఎ సిరీస్, గెలాక్సీ జె సిరీస్ లో వీటిని తీసుకురానుంది. గెలాక్సీ ఎ6, గెలాక్సీ ఎ6+ మోడళ్ల ధరలు రూ.20,000 నుంచి రూ.25,000 వరకు ఉంటాయని అంచనా. గెలాక్సీ జె సిరీస్ ఫోన్ల ధరలు రూ.15,000 నుంచి 20,000 మధ్య ఉండొచ్చని పరిశ్రమ వర్గాలు తెలిపాయి. ఈ నాలుగు ఫోన్లలో రెండు ఫోన్లలో డ్యుయల్ కెమెరా సెటప్ ఉంటుందని ఆ వర్గాలు వెల్లడించాయి. వీటిని నోయిడా కేంద్రంలో తయారు చేయనుంది.

సూపర్ అమోలెడ్ ఇన్ఫినిటీ డిస్ ప్లేతో ఇవి వుంటాయి. ఇటీవల ఫుల్ స్క్రీన్ మొబైల్స్ ట్రెండ్ నడుస్తున్న విషయం తెలిసిందే. నిజానికి శామ్ సంగ్ గెలాక్సీ 8, గెలాక్సీ 9 సిరీస్ ఫోన్లు ఇన్ఫినిటీ డిస్ ప్లేతో కూడినవే. కాకపోతే వీటి ధరలు రూ.40,000 పైమాటే. ఫుల్ స్క్రీన్ డిస్ ప్లే మొబైల్స్ హవా నడుస్తుండడంతో శామ్ సంగ్ సైతం తక్కువ ధరలతో మోడళ్ల విడుదల ద్వారా మార్కెట్ వాటాపై కన్నేసింది.