శతమానం భవతి, ఫిదా, డీజే.. ఇలా ఈ ఏడాది మాకు బాగా కలిసి వచ్చింది: దిల్ రాజు

ర‌వితేజతో త‌న‌కు 20 ఏళ్లుగా అనుబంధం ఉంద‌ని నిర్మాత దిల్‌రాజు అన్నారు. ర‌వితేజ న‌టిస్తోన్న‌ రాజా ది గ్రేట్ సినిమా ప్రీ రిలీజ్ ఫంక్ష‌న్ హైద‌రాబాద్ లో జ‌రుగుతోంది. ఈ సంద‌ర్భంగా దిల్ రాజు మాట్లాడుతూ... ఆర్య సినిమా స్క్రిప్ట్ మొద‌ట ర‌వితేజకు వినిపించామ‌ని అన్నారు. ఆ క‌థ త‌న‌కు స‌రిపోదేమో అని రవితేజ అన్నార‌ని చెప్పారు. అయితే, ఆ క‌థ చాలా బాగుంద‌ని అన్నార‌ని తెలిపారు. ఆ త‌రువాత‌ నితిన్‌, ప్ర‌భాస్ ల వ‌ద్ద‌కు కూడా ఆ స్క్రిప్ట్‌ వెళ్లిందని అన్నారు. చివ‌రికి బన్నీతో తీశామ‌ని దిల్ రాజు అన్నారు.

ఇక, తెలుగు సినిమాలో హీరో అంధుడిగా న‌టిస్తే అస‌లు ఆ సినిమా ఆడుతుందా? అని కొంద‌రు అన్నార‌ని చెప్పారు. ఈ సినిమాలో ఇంట‌ర్ వెల్ స‌మ‌యంలో ర‌వితేజ‌కు క‌ళ్లు వ‌స్తాయా? క్లైమాక్స్‌లో వ‌స్తాయా? అని కూడా డౌట్ ప‌డ్డార‌ని చెప్పారు. ఈ సినిమాలో మొదటి నుంచి శుభం కార్డు ప‌డే వ‌ర‌కు ర‌వితేజ అంధుడిగానే ఉంటాడంటే వారు న‌మ్మ‌లేక‌పోయార‌ని అన్నారు.  

తనకు తెలిసి ఇప్పటివరకు ఎవ్వరికీ రాని విధంగా తమకు ఈ ఏడాది మంచి విజయాలు వచ్చాయని దిల్ రాజు అన్నారు. శతమానం భవతి, ఫిదా, డీజే, నేను లోకల్.. ఇలా వరుసగా విజయాలు వచ్చాయని అన్నారు.