పాకిస్థాన్ లో యువకుడికి ఉరిశిక్ష అమలు

సరిహద్దు దేశం పాకిస్థాన్ లోని కరాచీ సెంట్రల్ జైలులో ఈ రోజు షఫ్ ఖత్ అనే యువకుడిని ఉరితీశారు. 2004లో ఏడు సంవత్సరాల బాలుడిని కిడ్నాప్ చేసి హత్య చేసిన కేసులో ఇతనికి ఉరిశిక్ష అమలు చేశారు. జనవరి 14నే ఉరితీయాలనుకున్నప్పటికీ నాలుగు సార్లు వాయిదా పడుతూ వచ్చింది. ఎట్టకేలకు ఈ రోజు అతనికి ఉరిశిక్ష అమలు చేశారు. ఈ కేసులో నేరం రుజువై ఉరిశిక్ష విధించినప్పటికీ అతని వయసును కారణంగా చూపి న్యాయవాదులు చిక్కులు సృష్టించారు. నేరం చేసే సమయానికి అతని వయసు 14 ఏళ్లేనని వాదించారు. ఈ నేపథ్యంలో పాక్ జువెనైల్ జస్టిస్ వ్యవస్థ ప్రకారం 18 సంవత్సరాలలోపు వ్యక్తికి ఉరిశిక్ష అమలు చేయరు. దాంతో మళ్లీ ప్రత్యేక దర్యాప్తు చేయడంతో నేరం చేసే నాటికి యవకుడి వయసు 23 ఏళ్లని తేలింది. మళ్లీ సుప్రీంకోర్టులో కూడా ఈ కేసుపై విచారణ జరిగింది. కానీ అత్యున్నత న్యాయస్థానం వయసు అభ్యంతరాలను పక్కనపెట్టింది. అదే సమయంలో పెషావర్ పాఠశాలలో జరిగిన పేలుళ్ల నేపథ్యంలో ఉరిశిక్షల అమలుపై ప్రభుత్వం అప్పుడే నిషేధాన్ని ఎత్తివేసింది. దాంతో షఫ్ ఖత్ ఉరి అమలుకు న్యాయపరంగా అడ్డంకులు తొలగిపోయాయి.