రెండోరోజూ నష్టాలు.. 238 పాయింట్లు కోల్పోయిన సెన్సెక్స్‌

దేశీయ స్టాక్‌ మార్కెట్లు వరుసగా రెండో రోజు నష్టాలతో ముగిశాయి. ఐటీ, ప్రభుత్వ రంగ బ్యాంకింగ్‌ షేర్లలో అమ్మకాల ఒత్తిడి పెరగడం, పశ్చిమాసియాలో కొనసాగుతున్న ఉద్రిక్తతలతో ఇన్వెస్టర్లు అప్రమత్తంగా వ్యవహరించడం మార్కెట్‌పై ప్రభావం చూపింది. దీంతో సెన్సెక్స్‌ 238.41 పాయింట్లు కోల్పోయి 77,470.11 వద్ద ముగియగా, నిఫ్టీ 50.80 పాయింట్లు తగ్గి 24,187.70 వద్ద స్థిరపడింది.

మరోవైపు మిడ్‌క్యాప్‌, స్మాల్‌క్యాప్‌ సూచీలు మాత్రం లాభాల్లో ముగిశాయి. రంగాల వారీగా చూస్తే పీఎస్‌యూ బ్యాంక్‌, ఐటీ సూచీలు ఎక్కువగా నష్టపోగా, కెమికల్స్‌, సిమెంట్‌ రంగాల్లో కొనుగోళ్లు కనిపించాయి.

నిఫ్టీ-50 సూచీలో శ్రీరామ్‌ ఫైనాన్స్‌, బజాజ్‌ ఫిన్‌సర్వ్‌, ఐషర్‌ మోటార్స్‌, అల్ట్రాటెక్‌ సిమెంట్‌, హెచ్‌సీఎల్‌ టెక్‌ షేర్లు లాభపడ్డాయి. హెచ్‌డీఎఫ్‌సీ బ్యాంక్‌, ఇన్ఫోసిస్‌, ఎస్‌బీఐ, టీసీఎస్‌, రియలన్స్‌ షేర్లు నష్టపోయిన వాటిలో ఉన్నాయి.

మార్కెట్‌పై భౌగోళిక రాజకీయ ఉద్రిక్తతలు, ముడిచమురు ధరల పెరుగుదల ప్రభావం కొనసాగుతోందని నిపుణులు పేర్కొన్నారు. అయితే మెరుగైన త్రైమాసిక ఫలితాలపై అంచనాలతో మిడ్‌క్యాప్‌ కంపెనీల్లో కొనుగోళ్లు కొనసాగుతున్నాయని చెప్పారు. నిఫ్టీకి 24,150-24,100 స్థాయుల వద్ద మద్దతు ఉండగా, 24,300-24,400 స్థాయులు కీలక నిరోధకంగా మారనున్నాయని విశ్లేషకులు అభిప్రాయపడ్డారు.