ఇంటి లోన్ తీసుకుంటున్నారా? ఈఎంఐ ఇలా సెట్ చేసుకోండి!

సొంత ఇల్లు అనేది ప్రతి ఒక్కరి కల. ఆ కలను నెరవేర్చుకోవడానికి చాలామంది గృహ రుణం (హోమ్ లోన్)పై ఆధారపడతారు. అయితే, హోమ్ లోన్ తీసుకునేటప్పుడు కేవలం బ్యాంకు ఎంత రుణం ఇస్తుందనే దానిపైనే కాకుండా, తిరిగి చెల్లించే వాయిదా (ఈఎంఐ) మన ఆర్థిక ప్రణాళికపై ఎలాంటి ప్రభావం చూపుతుందనేది కూడా ఆలోచించాలి. ఆర్థిక నిపుణుల ప్రకారం, మీ నెలవారీ జీతంలో (టేక్-హోమ్ శాలరీ) ఈఎంఐ 30 శాతం మించకుండా చూసుకోవడం అత్యంత సురక్షితమైన మార్గం.

రుణ అర్హత వేరు.. చెల్లించే స్థోమత వేరు

సాధారణంగా బ్యాంకులు మీ స్థూల ఆదాయంలో 50 నుంచి 55 శాతం వరకు ఈఎంఐ ఉండేలా రుణాలు మంజూరు చేస్తాయి. బ్యాంకు ఎక్కువ రుణం ఇస్తోందని చాలామంది తమ శక్తికి మించి అప్పు తీసుకుని ఇబ్బందుల్లో పడుతుంటారు. బ్యాంకు ఇచ్చే రుణ అర్హత వేరు, మీరు సౌకర్యవంతంగా తిరిగి చెల్లించగల స్థోమత వేరు అనే విషయాన్ని గుర్తుంచుకోవాలి.

ఈఎంఐ భారాన్ని మూడు రకాలుగా చూడవచ్చు. నెలవారీ ఆదాయంలో ఈఎంఐ 30 శాతం లోపు ఉంటే అది 'కంఫర్టబుల్ జోన్'. 30-40 శాతం మధ్య ఉంటే కొంత కఠినమైన బడ్జెట్‌తో 'నిర్వహించదగిన జోన్'. కానీ 40 శాతం దాటితే మాత్రం పొదుపు, పెట్టుబడులు, ఇతర దీర్ఘకాలిక లక్ష్యాలు దెబ్బతినే 'స్ట్రెస్ జోన్'లోకి వెళ్ళిపోతారు.

ఉదాహరణకు, మీ నెల జీతం రూ.1,00,000 అయితే, మీ ఈఎంఐ రూ. 25,000 నుంచి రూ. 30,000 లోపు ఉండేలా చూసుకోవడం సరైన నిర్ణయం. దీనివల్ల అనుకోని ఖర్చులు, పిల్లల చదువులు, ఆరోగ్య బీమా, అత్యవసర నిధి వంటి ఇతర ఆర్థిక లక్ష్యాలకు ఎలాంటి ఆటంకం ఉండదు. గృహ రుణం అనేది ఆస్తిని నిర్మించుకోవడానికి ఉపయోగపడాలి కానీ, మిమ్మల్ని ఆర్థికంగా చిక్కుల్లోకి నెట్టే భారంగా మారకూడదు.