ముంబైలో భర్త రాక్షసత్వం.. భార్యను గంటలపాటు కోడిపుంజు భంగిమలో నిలబెట్టి కత్తితో దాడి!

దేశ ఆర్థిక రాజధాని ముంబైలో అత్యంత దారుణమైన గృహ హింస ఘటన ఒకటి వెలుగులోకి వచ్చింది. ఓ హిస్టరీ షీటర్ తన భార్యను గంటల తరబడి 'కోడిపుంజు' భంగిమలో నిలబెట్టి చిత్రహింసలకు గురిచేయడమే కాకుండా, ప్రాణభయంతో పుట్టింటికి పారిపోయిన ఆమెను వెంటాడి కత్తితో దాడి చేశాడు. స్థానికుల సమాచారంతో పోలీసులు సకాలంలో స్పందించి నిందితుడిని అరెస్ట్ చేశారు.

పోలీసుల కథనం ప్రకారం.. ముంబైకి చెందిన రౌడీషీటర్ అర్బాజ్ సయ్యద్ (25), అతడి భార్య మధ్య కొంతకాలంగా కుటుంబ తగాదాలు ఉన్నాయి. ఈ క్రమంలోనే ఇంట్లో భార్యను ఓ గదిలో బంధించాడు. కత్తి చూపించి చంపేస్తానని, ముఖంపై యాసిడ్ పోస్తానని బెదిరించాడు. అంతటితో ఆగకుండా, ఆమెను దాదాపు నాలుగు గంటల పాటు కోడిపుంజు భంగిమలో నిలబెట్టి పైశాచిక ఆనందం పొందాడు.

అతడి నుంచి ఎలాగోలా తప్పించుకున్న బాధితురాలు ప్రాణభయంతో తన పుట్టింటికి పరుగులు తీసింది. అయితే, ఆమెను వదలని అర్బాజ్.. నేరుగా అత్తగారింటికి చేరుకున్నాడు. అక్కడ కూడా భార్యపై ఆగ్రహంతో ఊగిపోతూ, తన వెంట తెచ్చుకున్న కత్తితో విచక్షణారహితంగా దాడి చేశాడు. ఈ దాడితో భయపడిపోయిన బాధితురాలి కుటుంబ సభ్యులు వెంటనే పోలీసులకు సమాచారం అందించారు.

ఘటనా స్థలానికి చేరుకున్న పోలీసులు అర్బాజ్‌ను అదుపులోకి తీసుకున్నారు. అతడి నేర చరిత్రను పరిశీలించగా అర్బాజ్‌పై హత్యాయత్నం, దోపిడీ వంటి 19 తీవ్రమైన క్రిమినల్ కేసులు నమోదై ఉన్నాయని తేలింది. గాయపడిన భార్య ఇచ్చిన ఫిర్యాదు మేరకు పోలీసులు నిందితుడిపై హత్యాయత్నం, కిడ్నాప్ సహా పలు సెక్షన్ల కింద కేసు నమోదు చేశారు.