ఏడు రోజుల కీలక పర్యటనకు గాను సింగపూర్ చేరుకున్న ఏపీ మంత్రుల బృందం
- నేటి నుంచి ఈ నెల 27 వరకు కొనసాగనున్న మంత్రుల సింగపూర్ పర్యటన
- పలు శిక్షణ కార్యక్రమాల్లో పాల్గొననున్న మంత్రులు
- సింగపూర్ పాలనా నమూనాను అధ్యయనం చేయనున్న మంత్రుల బృందం
ఆంధ్రప్రదేశ్‌లోని కూటమి ప్రభుత్వానికి చెందిన ఏడుగురు మంత్రుల బృందం ఈ ఉదయం సింగపూర్ చేరుకుంది. రాష్ట్రంలో ఆధునిక పరిపాలన, ఉత్తమ పాలనా పద్ధతులను ప్రవేశపెట్టడమే లక్ష్యంగా ఈ నెల 27వ తేదీ వరకు, అంటే మొత్తం ఏడు రోజుల పాటు ఈ పర్యటన కొనసాగనుంది. మంత్రుల బృందం ఈ ఉదయం సింగపూర్ చేరుకోగానే, అక్కడి తెలుగు అసోసియేషన్ ప్రతినిధులు వారికి ఘనంగా స్వాగతం పలికారు. మంత్రులు అచ్చెన్నాయుడు, పి. నారాయణ, అనగాని సత్యప్రసాద్, బీసీ జనార్దన్ రెడ్డి, సత్యకుమార్ యాదవ్, వంగలపూడి అనిత, నాదెండ్ల మనోహర్ ఈ బృందంలో ఉన్నారు.
వరల్డ్ బ్యాంక్, సింగపూర్ ప్రభుత్వ భాగస్వామ్యంతో ఏర్పాటైన 'సింగపూర్-ఏపీ జాయింట్ ఇన్‌స్టిట్యూట్ ఫర్ వరల్డ్ క్లాస్' (SGJIWC) ఒప్పందంలో భాగంగా మంత్రులు పలు శిక్షణ కార్యక్రమాల్లో పాల్గొననున్నారు. ముఖ్యంగా 'నేషన్ ఫస్ట్' వంటి నాయకత్వ సూత్రాలు, రాజకీయ జవాబుదారీతనం, పారదర్శక పాలనపై నిర్వహించే 'ట్రైనింగ్ ఆఫ్ ట్రైనర్స్' (ToT) సెషన్లలో మంత్రులు కీలక విషయాలను తెలుసుకోనున్నారు.
మౌలిక సదుపాయాల కల్పన, పట్టణ ప్రణాళిక, ప్రజా సేవల నిర్వహణలో సింగపూర్ అనుసరిస్తున్న విజయవంతమైన విధానాలను మంత్రులు క్షేత్రస్థాయిలో పరిశీలించనున్నారు. సింగపూర్ పాలనా నమూనాను అధ్యయనం చేసి, వాటిని ఆంధ్రప్రదేశ్ అభివృద్ధికి అన్వయించుకోవడం ద్వారా రాష్ట్ర పరిపాలనలో విప్లవాత్మక మార్పులు వస్తాయని ప్రభుత్వం భావిస్తోంది. ఈ పర్యటన ముగిసిన అనంతరం రాష్ట్ర కేబినెట్‌లో పలు కీలక నిర్ణయాలు వెలువడే అవకాశం ఉందని రాజకీయ వర్గాలు విశ్లేషిస్తున్నాయి.
