విష్వక్సేన్ 'కల్ట్' టీజర్ ఇదిగో... వయొలెన్స్ ఓ రేంజిలో!

మాస్ కా దాస్ విష్వక్సేన్ నటిస్తూ, స్వీయ దర్శకత్వంలో తెరకెక్కిస్తున్న చిత్రం 'కల్ట్'. "ఇండియాస్ ఫస్ట్ స్లాషర్ ఫిల్మ్" అనే ట్యాగ్‌లైన్‌తో వస్తున్న ఈ సినిమా టీజర్‌ను శనివారం హైదరాబాద్‌లో ఘనంగా విడుదల చేశారు. అత్యంత హింసాత్మకమైన, ఉత్కంఠభరితమైన విజువల్స్‌తో ఈ టీజర్ ప్రస్తుతం సోషల్ మీడియాలో తీవ్ర చర్చనీయాంశంగా మారింది.

టీజర్ ప్రకారం, గోవాలో స్నేహితులంతా కలిసి జరుపుకొనే ఓ పార్టీ, ప్రాణాలతో చెలగాటమాడే భయంకరమైన గేమ్‌గా మారుతుంది. ఈ గేమ్‌లో ఓడిన వారిని అతి కిరాతకంగా చంపేస్తుంటారు. ఈ డెడ్లీ గేమ్‌ను నడిపించే 'గేమ్ మాస్టర్' పాత్రలో విష్వక్సేన్ కనిపించారు. తలలు నరకడం వంటి రక్తపాతంతో కూడిన షాట్స్ సినిమా ఏ స్థాయిలో ఉండబోతోందో తెలియజేస్తున్నాయి.

విష్వక్సేన్ దర్శకత్వం వహిస్తున్న మూడో చిత్రమిది. 'కేజీఎఫ్', 'సలార్' చిత్రాల ఫేమ్ రవి బస్రూర్ ఈ చిత్రానికి సంగీతం అందిస్తుండగా, ప్రముఖ దర్శకుడు తరుణ్ భాస్కర్ సంభాషణలు రాయడం విశేషం. తారక్ సినిమాస్, వన్మయి క్రియేషన్స్ పతాకాలపై సందీప్ కాకరాల ఈ చిత్రాన్ని నిర్మిస్తున్నారు.

హైదరాబాద్ ప్రసాద్స్ మల్టీప్లెక్స్‌లో జరిగిన టీజర్ లాంచ్ కార్యక్రమంలో, సినిమాలోని కంటెంట్‌పై ఓ మహిళా జర్నలిస్టు అడిగిన ప్రశ్నకు విష్వక్సేన్ ఘాటుగా స్పందించడం వాగ్వాదానికి దారితీసింది. ఈ చిత్రాన్ని తెలుగుతో పాటు హిందీ, జపనీస్, స్పానిష్, ఇంగ్లీష్ భాషల్లోనూ విడుదల చేసేందుకు నిర్మాతలు సన్నాహాలు చేస్తున్నారు.