'పెద్ది' ఫస్ట్ సింగిల్.. బీడీ తాగుతూ రామ్‌చరణ్ కొత్త హుక్ స్టెప్ అదుర్స్

మెగా పవర్ స్టార్ రామ్‌చరణ్ హీరోగా, 'ఉప్పెన' ఫేమ్ బుచ్చిబాబు సాన దర్శకత్వంలో తెరకెక్కుతున్న భారీ చిత్రం 'పెద్ది'. ప్రస్తుతం శరవేగంగా షూటింగ్ జరుపుకుంటున్న ఈ సినిమా నుంచి మేకర్స్ కీలక అప్‌డేట్ ఇచ్చారు. ఎప్పుడెప్పుడా అని ఎదురుచూస్తున్న ఫస్ట్ సింగిల్ 'చికిరి చికిరి' పాటను రేపు ఉదయం 11:07 గంటలకు విడుదల చేయనున్నట్లు ప్రకటించారు. ఈ సందర్భంగా ఓ కొత్త పోస్టర్‌ను విడుదల చేయగా, అది సోషల్ మీడియాలో వైరల్ అవుతోంది.

ఇప్పటికే విడుదలైన ఈ పాట హుక్ స్టెప్ ప్రోమో అభిమానులను విశేషంగా ఆకట్టుకుంది. ఇప్పుడు రిలీజ్ చేసిన కొత్త పోస్టర్‌లో రామ్‌చరణ్ బీడీ తాగుతూ మరో పవర్‌ఫుల్ హుక్ స్టెప్ వేస్తున్నట్లు కనిపించడం సినిమాపై అంచనాలను రెట్టింపు చేసింది. ఒకే పాటలో ఇన్ని హుక్ స్టెప్స్ ఉండటంతో అభిమానుల్లో క్యూరియాసిటీ పెరిగింది. ఈ పోస్టర్‌తో పాటపై మరింత హైప్ క్రియేట్ అయింది.

రూరల్ స్పోర్ట్స్ యాక్షన్ డ్రామా నేపథ్యంలో పాన్ ఇండియా స్థాయిలో రూపొందుతున్న ఈ చిత్రంలో రామ్‌చరణ్‌కు జోడీగా జాన్వీ కపూర్ నటిస్తోంది. ఇటీవలే శ్రీలంకలో వీరిద్దరిపై ఒక పాటతో పాటు కీలక సన్నివేశాలను చిత్రీకరించారు. ఈ చిత్రానికి ఆస్కార్ విజేత ఏఆర్ రెహమాన్ సంగీతం అందిస్తుండటం విశేషం. కన్నడ సూపర్ స్టార్ శివ రాజ్‌కుమార్‌తో పాటు జగపతిబాబు, దివ్యేందు శర్మ వంటి ప్రముఖ నటులు కీలక పాత్రల్లో కనిపించనున్నారు.

మైత్రీ మూవీ మేకర్స్, సుకుమార్ రైటింగ్స్, వృద్ధి సినిమాస్ సంయుక్తంగా ఈ ప్రతిష్ఠాత్మక ప్రాజెక్ట్‌ను నిర్మిస్తున్నాయి. ఈ చిత్రాన్ని 2026 మార్చి 27న ప్రపంచవ్యాప్తంగా గ్రాండ్‌గా విడుదల చేసేందుకు సన్నాహాలు చేస్తున్నారు.