మరోసారి తండ్రి అయిన సుహాస్
- ఈసారి కూడా మగబిడ్డకే జన్మనిచ్చిన సుహాస్ భార్య లలిత
- సోషల్ మీడియా ద్వారా ఆనందం పంచుకున్న హీరో
- గతేడాది జనవరిలో మొదటి కుమారుడి జననం
గతేడాది జనవరిలో సుహాస్ దంపతులకు మొదటి కుమారుడు జన్మించగా, ఇప్పుడు రెండో వారసుడు కూడా వారి కుటుంబంలోకి అడుగుపెట్టాడు. సుహాస్ కెరీర్ ప్రారంభం నుంచి తనకంటూ ఓ ప్రత్యేక శైలిని ఏర్పరుచుకున్నారు. షార్ట్ ఫిల్మ్స్ నుంచి నటుడిగా ప్రయాణం మొదలుపెట్టి, పలు చిత్రాల్లో సహాయ నటుడిగా, కమెడియన్గా మెప్పించారు. 'కలర్ ఫొటో' సినిమాతో హీరోగా మారి తొలి ప్రయత్నంలోనే జాతీయ స్థాయిలో గుర్తింపు పొందారు. ఆ తర్వాత 'రైటర్ పద్మభూషణ్', 'అంబాజీపేట మ్యారేజీ బ్యాండ్' వంటి చిత్రాలతో నటుడిగా తన స్థానాన్ని పదిలం చేసుకున్నారు.
సుహాస్ కెరీర్ పరంగానే కాకుండా, వ్యక్తిగత జీవితంలోనూ ఆసక్తికరమైన ప్రయాణం సాగించారు. తన ప్రేయసి లలితను ఏడేళ్ల పాటు ప్రేమించారు. వారి పెళ్లికి పెద్దలు అంగీకరించకపోవడంతో, 2017లో ఇంటి నుంచి వెళ్లిపోయి వివాహం చేసుకున్నారు. తన భార్య అడుగుపెట్టాకే తన జీవితం మారిపోయిందని, ఆమె తన అదృష్టమని సుహాస్ పలు సందర్భాల్లో పేర్కొన్నారు. ప్రస్తుతం సుహాస్ కెరీర్ పరంగా ఫుల్ బిజీగా ఉన్నారు. ఆయన చేతిలో రెండు తెలుగు చిత్రాలతో పాటు, ఓ తమిళ సినిమా కూడా ఉంది.
