నటుడు మిథున్ చక్రవర్తికి బీఎంసీ షాక్.. షోకాజ్ నోటీసుల జారీ

ప్రముఖ సినీ నటుడు మిథున్ చక్రవర్తికి బృహన్ ముంబై మున్సిపల్ కార్పొరేషన్ (బీఎంసీ) షోకాజ్ నోటీసు జారీ చేసింది. మలాడ్‌లో ఆయనకు చెందిన ప్రాంగణంలో అనుమతులు లేకుండా నిర్మాణాలు చేపట్టారన్నది ప్రధాన ఆరోపణ. ఈ మేరకు ఈ నెల 10న బీఎంసీ అధికారులు ఈ నోటీసును పంపించారు.

అనుమతి లేకుండా గ్రౌండ్ ఫ్లోర్‌తో పాటు మెజనైన్ ఫ్లోర్‌ను నిర్మించారని నోటీసులో బీఎంసీ పేర్కొంది. సాధారణంగా రెండు అంతస్తుల మధ్య పాక్షికంగా నిర్మించే ఫ్లోర్‌ను మెజనైన్ ఫ్లోర్ అంటారు. ఇలాంటి నిర్మాణాలతో పాటు, ఇటుక గోడలు, చెక్క పలకలు, గాజు అద్దాలు, ఏసీ షీట్లతో కూడిన పైకప్పుతో 10x10 అడుగుల విస్తీర్ణంలో మూడు తాత్కాలిక నిర్మాణాలను కూడా అనుమతి లేకుండానే చేపట్టారని బీఎంసీ గుర్తించింది.

ఈ అక్రమ నిర్మాణాలను వెంటనే తొలగించాలని, లేనిపక్షంలో ముంబై మున్సిపల్ కార్పొరేషన్ చట్టంలోని సెక్షన్ 475ఎ కింద చట్టపరమైన చర్యలు తీసుకుంటామని బీఎంసీ తన నోటీసులో మిథున్ చక్రవర్తిని హెచ్చరించింది. అనుమతి లేని నిర్మాణాలను తొలగించడంలో విఫలమైతే ఈ సెక్షన్ కింద చర్యలు తీసుకునే అధికారం బీఎంసీకి ఉంటుంది.