సంచలన వీడియో... రాజ్ తరుణ్-లావణ్య వ్యవహారంలో మరో ట్విస్ట్!

నటుడు రాజ్ తరుణ్, శేఖర్ బాషా తనను చంపేందుకు ప్రయత్నిస్తున్నారని లావణ్య నిన్న నార్సింగి పోలీసులను ఆశ్రయించారు. అంతకుముందు, రాజ్ తరుణ్ తల్లిదండ్రులను లావణ్య ఎట్టకేలకు ఇంట్లోకి అనుమతించారు. ఈ సందర్భంగా రాజ్ తరుణ్, తల్లిదండ్రులు బసవరాజ్, రాజేశ్వరి మాట్లాడుతూ... లావణ్య తమ కోడలు కాదని, వారు పెళ్లి చేసుకోలేదని, కేవలం సహజీవనం చేశారని వెల్లడించారు. అందువల్ల ఆమెను తాము కోడలిగా అంగీకరించబోమని స్పష్టం చేశారు. ఈ నేపథ్యంలో ఒక షాకింగ్ వీడియో సామాజిక మాధ్యమాల్లో వైరల్ అవుతోంది. 

ఈ వీడియోలో లావణ్య, రాజ్ తరుణ్ ఇద్దరూ కలిసి రాజ్ తరుణ్ తల్లిదండ్రుల కాళ్లకు నమస్కరించి ఆశీర్వాదం తీసుకుంటున్న దృశ్యాలు ఉన్నాయి. ఆ సమయంలో అందరూ ఎంతో సంతోషంగా, నవ్వుతూ కనిపించారు. వారి మధ్య సత్సంబంధాలు ఉన్నప్పటి వీడియోగా దీనిని భావిస్తున్నారు. అయితే, ప్రస్తుత ఉద్రిక్త పరిస్థితుల నేపథ్యంలో ఈ వీడియోను లావణ్య లేదా ఆమె సన్నిహితులు ఉద్దేశపూర్వకంగానే విడుదల చేశారా అనే ప్రచారం జరుగుతోంది. 

గతంలో ఇంత అన్యోన్యంగా ఉన్న రాజ్ తరుణ్ కుటుంబ సభ్యులు ఇప్పుడు తనపై దాడికి పాల్పడ్డారని చెప్పేందుకే లావణ్య ఈ వీడియోను బయటపెట్టి ఉండొచ్చని కొందరు వ్యాఖ్యానిస్తున్నారు. ఈ వీడియో ఎప్పటిది అనే దానిపై స్పష్టత లేనప్పటికీ, ప్రస్తుత వివాదానికి ఇది కొత్త కోణాన్ని జోడించింది.