Raviteja: గజదొంగల కథలతో ఇక్కడ రవితేజ .. అక్కడ కార్తి!

రవితేజ కథానాయకుడిగా 'టైగర్ నాగేశ్వరరావు' సినిమా రూపొందుతోంది. అభిషేక్ అగర్వాల్ నిర్మిస్తున్న ఈ సినిమాకి వంశీ దర్శకత్వం వహిస్తున్నాడు.  ఇటు ప్రజలను .. అటు పోలీస్ వారిని నానా తిప్పలు పెట్టిన స్టూవర్టుపురం గజదొంగ కథ ఇది. ఆ పాత్రలో రవితేజ కనిపించనున్నాడు. ఇక సినిమా పరమైన మార్పులు చేర్పులు ఉంటూనే ఉంటాయి. 

తమిళంలో కార్తి కూడా గజదొంగ నేపథ్యంలో సాగే కథనే చేస్తున్నాడు. కార్తి డిఫరెంట్ లుక్ తో కనిపించనున్న ఆ సినిమా పేరు 'మురుగన్'. గతంలో ఒక నగల దుకాణం నుంచి 13 కోట్ల విలువైన బంగారాన్ని దొంగిలించిన గజదొంగ కథ ఇది. ఎస్. ప్రకాశ్ బాబు - ఎస్. ఆర్. ప్రభు నిర్మించిన ఈ సినిమాకి, రాజు మురుగన్ దర్శకత్వం వహించాడు. 

కార్తి చేస్తున్న ఈ సినిమాకి జీవీ ప్రకాశ్ కుమార్ సంగీతాన్ని సమకూర్చుతున్నాడు. కార్తి జోడీగా అనూ ఇమ్మాన్యుయేల్ అలరించనుంది. ఒక కీలకమైన పాత్రలో సునీల్ కనిపించనున్నాడు. గజదొంగల నేపథ్యంలో రూపొందుతున్న ఈ రెండు సినిమాల్లో ఏ సినిమా ఏ స్థాయి వసూళ్లను రాబడుతుందనేది చూడాలి.