Nagababu: మహాసేన రాజేష్ గురించి జనసైనికులు ఎవరూ తప్పుగా మాట్లాడకండి: నాగబాబు
- టీడీపీలో చేరనున్న మహాసేన రాజేష్
- ఈ నెల 16న ముహూర్తం
- పెద్దాపురంలో చంద్రబాబు సమక్షంలో టీడీపీలో చేరేందుకు సన్నాహాలు
- ఇటీవల జనసేనలో చేరతాడంటూ ప్రచారం
దళిత వర్గాల్లో ప్రత్యేక గుర్తింపు ఉన్న మహాసేన రాజేష్ ఈ నెల 16న చంద్రబాబునాయుడు సమక్షంలో టీడీపీలో చేరనున్న సంగతి తెలిసిందే. ఉమ్మడి గోదావరి జిల్లాల పర్యటన సందర్భంగా చంద్రబాబు పెద్దాపురం రానున్నారు. ఈ సందర్భంగా మహాసేన రాజేష్ టీడీపీ తీర్థం పుచ్చుకోనున్నారు. ఆయన తొలుత జనసేనలోకి వెళతారని ప్రచారం జరిగింది. అయితే, టీడీపీలో చేరుతున్నట్టు ఇటీవల ప్రకటించారు.
ఈ నేపథ్యంలో, జనసేన పార్టీ పొలిటికల్ అఫైర్స్ కమిటీ సభ్యుడు నాగబాబు స్పందించారు. మహాసేన రాజేష్ గురించి జనసైనికులు ఎవరూ తప్పుగా మాట్లాడకండి అంటూ ట్వీట్ చేశారు. అతను ఏ పార్టీలో చేరాలనుకుంటున్నాడనేది అతని ఇష్టం... అది తన ప్రజాస్వామ్య హక్కు అని నాగబాబు స్పష్టం చేశారు. అతడి నిర్ణయం ఎలాంటిదైనా గౌరవించాలని, అతడికి శుభాకాంక్షలు తెలపాలని సూచించారు.
