Rohit Sharma: రెండో వన్డేలో రోహిత్ శర్మ బొటనవేలికి గాయం... స్కానింగ్ కోసం ఆసుపత్రికి తరలింపు

బంగ్లాదేశ్ తో రెండో వన్డే సందర్భంగా టీమిండియా కెప్టెన్ రోహిత్ శర్మ గాయపడ్డాడు. సిరాజ్ వేసిన ఇన్నింగ్స్ రెండో ఓవర్ సెకండ్ స్లిప్ లో ఫీల్డింగ్ చేస్తున్న రోహిత్ శర్మ బంతిని పట్టే ప్రయత్నంలో విఫలమయ్యాడు. ఈ క్రమంలో రోహిత్ ఎడమచేతి బొటనవేలికి గాయమైంది. 

బాధతో విలవిల్లాడిన రోహిత్ మైదానాన్ని వీడాడు. రోహిత్ ను పరీక్షించిన బీసీసీఐ మెడికల్ టీమ్ అతడికి వైద్య పరీక్షలు అవసరమని తేల్చింది. దాంతో, రోహిత్ ను ఢాకాలోని ఓ ఆసుపత్రికి తరలించారు. గాయం తీవ్రతను తెలుసుకునేందుకు స్కానింగ్ నిర్వహించనున్నారు. ఈ మేరకు బీసీసీఐ ఓ ప్రకటనలో వెల్లడించింది. 

కాగా, రెండో వన్డేలో టాస్ గెలిచి బ్యాటింగ్ ఎంచుకున్న బంగ్లాదేశ్ 34 ఓవర్లు ముగిసేసరికి 6 వికెట్లకు 144 పరుగులు చేసింది. తొలి వన్డే హీరో మెహిదీ హసన్ 41, మహ్మదుల్లా 34 పరుగులతో క్రీజులో ఉన్నారు. టీమిండియా బౌలర్లలో వాషింగ్టన్ సుందర్ 3, సిరాజ్ 2, ఉమ్రాన్ మాలిక్ 1 వికెట్ తీశారు.